24.12.06

Buonas Fiestas i Feliç Anho Nuobo!!

Toda la redaçon deste blog ben desta forma desear a toda la giente, leitores, screbidores, resmungadores i toda la malta anterbeniente eiqui, un mui buono Natal e apuis ua inda melhor passaige de anho!
Para esso pongo eiqui ua performance feita pur cinco de ls nuossos bloggueiros a tocar ua moda típica de Natal. Esta moda an Fa# maior ye tocada pur un quinteto de garrafas de cerbeija Super Bock afinadas an dieç minutos.
Paç para todo l mundo!

28.11.06

Prémio Jesé Afonso 2006

Diç que l portal Crónicas da Terra fai de la música folk e de la world music l sou tema i ten fin la sue preserbaçon i dibulgaçon. Neste portal pude-se acumpanhar muitos grupos destes modos musicales, assi cumo cunsultar ua agenda mui detalhada de spetáculos que estes grupos fáien pulpaíç todo.
Pus acuntece q la Cámara Municipal de la Amadora cuncede zde 1988 un prémio - l prémio Jesé Afonso - que ten por oujetibo stimular la criaçon musical de ourige pertuesa. Astanho, l júri ancargado de antregar l prémio decediu nun l'atribuir "por não ter encontrado mérito consoante com o perstígio do prémio" an ningun de'ls trabalhos que les fúrun ambiados pulas eiditoras desses mismos grupos. L Crónicas da Terra decediu nomear 8 discos nacionales que segundo este portal cumprem culs requesitos para la candidatura a tal prémio. Nestes 8 discos stá ancluído l trabalho de'ls Galandum Galundaina - "Modas i Anzonas" i cumo la petiçon se fai pur cumentarios ne'l site de'l Crónicas da Terra, queda eiqui l link para que podais tamien botar an quien mais gustardes...
Eiqui stá la petiçon.

7.11.06

La anternete na terceira eidade!

Cumo ya ye normal, la nuossa mui buona tierra stá siempre alantre de las outras, e esto ye mais un caso! Diç que agora la anternete nun ye só para ls garoticos jogaren uns netgames, i la jubantude ber l sou correio e mais uas cousas que le anteressen. Agora ye la camada mais antiga de Fuonte Aldé que manobra estas caixicas que se lhigan al mundo! Esta foto ye la cunfirmaçon! Ls reporteres presentes cunfirmaram que se fai historia, i las páginas mais bistas son la pagina de la bolsa de balores, para ber la cotaçon de ls titulos de la Galpenergia, apuis dessa son la www.feias.com i la www.rapazasznudas.com. Inda onte staba Duarte a dezir para l cumpanheiro anternauta: "-Ah Zé! Pon-te nas mies! Estas ye que son guapas!" Las açones de la EDP, claro. Ye claro que eilhes so ban pala anternet quando ya nun hai garotada, se nó als garotos inda se le antolhaban a jogar na bolsa i isso nun lo queremos pur eiqui! Melhor que se habituen a ber rapazas znudas, nó?
L próximo passo nesta tierra será poner ua rede wireless pur toda la aldé para cada un de sue casa poder cunsultar l que mais raiba le deia sin que la gente lo beia na associatiba.

6.11.06

Rock i Balhe para todos!!!


Cun bino i tramoços, la fiesta bai a ser rija.

4.11.06

Rock in Rio - Fuonte Aldé



Diç que ls ansaios pra tocar nel Rock in Rio - Fuonte Aldé ia ampeçoron i se la cousa assi cuntinuar...
Bai a ser fiesta rija!!

3.11.06

Pur um bal de baixo i bal de cima melhor















Diç que l maior festibal del mundo nel próximo anho bai a ser an Fuonte Aldé. La redaçon deste afamado blog diç que falou l’ outro die cun Sr. Roberto Medina (ourganizador de l festibal) i l tiu cunfirmou la nuobidade. Pois é cara, é mesmo assim, eu escolhi este sichio pur ser um locau bem legau. A genchi podi colocar um escenário la nu fundo junto à lagoa, outro lá no cimo junto ao parqui desporchivo e outro ainda ali na rocha du passarinho. Dixe tiu Medina. La redaçon cunseguiu scubrir que la rocha du passarinho ye la Fraga de l Cúcu.

La frase de promoçon deste festibal ye “Pur um bal de baixo i bal de cima melhor”. Dixe Medina: A genchi antes tinha a frase “ pur um mundo milhor” mais isso é muito gificiu, agora temos outra ideia, vamos começa com uma coisinha aqui outra ali, e daqui a muitos anos vamos ter o mundo melhor sem dúvida cara!! Dixe ainda Roberto Medina que todos ls ouros ganhos nel festibal ban a ser inbestibos nel bal de Fuonte Aldé fazendo berdadeiras auto-stradas cun dous carreiros pra cada lhado pra tuodas las huortas que ai nel balhe. L carreiro de la squierda ye para ir quando se tem pouca buntade de scabar i l de la dreita ye para quando se tem muita buntade de chegar a la huorta.

Bamos anton a sperar pur las próximas nubidades a ber cumo bai a ser l cartaç del festibal i que grupos beniran. Diç que Medina ya falou cun l acordionista de Augas Bibas i l de Bila Chana.

22.10.06

Diç que an Fonte Aldé se bai a fazer ua fiesta mui baliente. Bai si senhor e ie iá no die nuobe de Dezembro, nun hadem faltar gaitas e beiladores, fraitas e concertinas, bino nuobo e bitela e tanta animaçon que até buona jeira. Diç que durante la manhana, ben giente amportante para falar de turismo e de las potencialidades turísticas de la nuossa region. Mas l que la giente quier, ie mesmo de la fiesta de la nuite! e bien animada.

A la fiesta de la Rezosa
Tanta giente quier benir
La cousa iá ie famosa
Porque hai bitela gostosa
E la ACReFA sabe serbir.

4.10.06

Gaitas e Gueiteiros

Diç que an Fuonte Aldé nun hai giente amportante!!! Isso serie dantigamente. Passaba iou, passeaba melhor dezindo, nua abenida de Bragancia quando me sbarrei cun eilhes. Alhi estaban bien pimpones para toda la giente ls ber an frente a l Forum Teatro. Inda l dixe a Diana, "- Pon-te ende a la borda de tou padrino que apuis pensan que tamien sós de l grupo!" Mas eilha nun quijo e iou saquei assi l retrato. Anton hai ou nun hai giente amportante na nuossa terrica? Biba Fuonte Aldé!!!

3.10.06

Maqueiros

Diç que an Fuonte Aldé bai a abrir ua scuola de maqueiros.
Será berdade ou mintira? you num l sei dezir, mas l que ie cierto ie que yá ai candidatos.
Mirai só se nun daba um quadro que até pudie serbir para postal.
Mas se l bissades cumo you l bi! Todo amprobisado, ls maqueiros e la maca.
L que nun era e para zgracia de l anfermo, Juan Raton trociu um pie quando jogaba la bola no stadio de las caganetas, apanhou boleia nua maca feita de dous palos e ua saca de l adubo cun dous burricos a puxar por eilha, e ls simplórios inda se rien!!!

14.9.06

Direçon de l Nuobas bai abrir bagas para la Redaçon!

Diç que la redaçon deste mui afamado blog bai a star abierta para nuobas candidaturas!
Diç assi l quemunicado:
"Se te gusta falar de ls outros, bien ou mal, screbir an mirandés i falar de la nuossa tierra, esta ye la tue ouportunidade para antegrares ua grande eiquipa de buonas personas, a quien les gusta falar, boer, screber, cantar, ir de buieiro, poner ls dedos na nariç i sacar perdizes, andar pur la anternet a ber gajas, e studar la nuossa cultura mirandesa, atão isto ye l melhor que fazes! Para la cadidatura teneis que ambiar um e-mail (an mirandés, claro!) para la mi persona para: manelmeirinhos[arroba]gmail.com (teneis que trocar l que diç [arroba] pur ua coisa destas -> @). Apuis solo teneis que screbir l purquei de la bussa eintençon, i apegais-le ua Carta de Motibaçon. Se tubirdes Cartas de Recomendaçon de grandes scritores portugueses ou mirandeses inda ye melhor! Ou atao de redatores de l nuosso blog!
Oubrigado pulas cartas de antemano!"
Yá sabeis, la ordem de scolha ye pur ls de la tierra, mas stamos abiertos a quien nun seia, mas que guste de falar de la nuossa tierra!

Gasoil agrícola bai a chubir


Diç que bai a chubir l preço del gasoil agrícola e Tiu Euduardo de las bombas nada pudrá fazer para l mantener.
An Fuonte Aldé yá ampeçan a puner las bacas als carros para duonhos i bacas se iren habituando uns als outros.
Puode ser que Manel Felç, Norberto, Altino i Albino le digan algo al cundutor de la cisterna para le dar l recado al chefe de la Galp para que spere un cachico anquanto ls tratoristas amansan mais uas bacas.

3.9.06

Quei seran estas pinturas?


Diç que hai uas pinturas en Fuonte Aldé, será arte moderna ou arte antiga?
Será que l'amigo de la naturaleza tamien ye un artista?
Quien quejir, puode ber la arte n'l chupon de la casa d'l amigo de la naturaleza.

25.8.06

L porquei desto star tan parado


Diç que la razon pla qual este blogue anda an stand by yá algun tiempo, se debe a cuntratos q´ls culaboradores faziran cun la central cerbejeira pra este mes d´Agosto. Ou seia, por mutivos laborales deberas cansatibos a que cada culaborador deste blogue se ten ampenhado cun toda la gana pra cumprimiento d´ls respetibos cuntratos.
I cumo cun la sede nun se brinca ai que cumprir essos cuntratos ate l fin.

L padre nousso de Founte Aldé

L álcool ye l miu pastor
Cerbeija nun me faltará…

Cerbeija frie que stais nel tasco
Sperando pul fin de la semana.
Benga a nos l copo cheno.
Seia feita la noussa fiesta, asi an la
Sexta cumo nel sabado.
L alcool nousso de cada die nos dai hoije,
Perdonai las noussas borracheiras,
Asi cumo nos perdonamos
A quien nun tenga buido.

I nun mus deixeis cair nel smol
I lhibrai-mos de l´auga.

Ámen…doins

15.8.06

Un camino a seguir...


Diç que l'ambiente stá an alta. Hai un rapaç que stacionou la biatura para poder cumprar ua bicicleta. El sabe-la toda, poupa n'l gasol que nun ye nada barato, proteije l'ambiente, abaixa la barriga (que nestes tiempos la cerbeija ye muita i las rapazas gustan de la ber guapa), son só bantaijes. Cumo se puode ber, la biatura yá stá stacionada bai pra 3, 15 dies, las silbas inda nun tenien nascido, l tronco inda nun staba alhi, i la yerba por baixo, tamien inda nun habie. L mundo precisa de "ECOMAN's" assi.

8.8.06

La Grade de l Campanairo

Ua pessona mie amiga natural d'acá mas que bibe fuora yá muitos anhos, debota leitora de l blog, pediu-me para transcreber l seguinte texto.
"Regresso de férias a esta terra onde as raízes me prendem a alma, a mim, e também aos meus rebentos.
Claro que não podia deixar de visitar e apreciar as obras da nossa igreja, practicamente o único monumentoque esta querida aldeia possui.
Entre outras coisas que me saltaram à vista e não vou comentar, a troca da grade do escadario pôs-me os pêlos de ponta. Será que agora em Fonte de Aldeia, onde atá há engenheiros e arquitectos, ninguem reparou na troca? ... É indiscutível a beleza do trabalho da antiga, comparada com aqueles ferros espetados às três marteladas.
Onde irá parar tal gradeamento!!! Quem será o seu herdeiro ilegítimo!!!
Cuidado, não troquem as "campanas" por umas de lata.
Sr. Presidente da Junta de Freguesia, abra os olhos, o povo elegeu-o para que esteja atento a estes pormenores, não eu claro, pois há muito tempo que deixei de ter voto aqui, mas ainda considero que tenho o dever de tal comentário.
Ai que saudades do Sr. padre Mourinho, rezava missa em 10 minutos e jamais permitiria que alguem, fosse quem fosse, destruí-se assim o nosso património,
Espero que as Almas e a Santíssima Trindade evitem este crime, já que os humanos devem estar loucos..."

27.7.06

You sou amigo de la naturaleza!!!



Ye amportante reciclar las bicicletas, quier dezir: de dues fazer ua.

15.7.06

Cura Milagrosa

Diç que fui çcubierto mui recentemente por alguien que se quier mantener anónimo, un remédio que bai a dar muito que dezir.
La cura de todos ls males.
Ciática, delor de cabeça, de dientes, de zinolhos, de cutbeilho, feridas malas, coixo de aranhon, etc., etc., etc., e tal, anfin, para todo l que hai de malo e de buono e, nun ten cura tamien.
Segundo rebelou l tal ambentor que nun quier ser çcubierto, (solo you e mais uns poucos ye que l conhecemos), l remédio consiste nua mistela feita a partir de casca de cascaboi bien molida, uas yerbas que solo las hai en Ourrietatanor, cortiça birge, brebas berdes e cachuola de palomba trocal.
Muole-se, remuole-se i torna-se a remuoler isto todo, mete-se nua caçuola de barro de Mobeiros i deixa-se a cundir em binagre de bino ambinagrado durante la purmeira lhuna de Fabreiro.
Apuis de acabar la lhuna, debe guardar-se bien guardado nua calabaça i sperar que nun benga ningun delor.
Mas se fur l caso, l dolente debe deitar-se de barriga para baixo, l mais tardar antes de l nacer de l sol e untar la parte dolida cun este milagroso remédio.
Quemer i buer bien i sperar que l delor passe, sin fazer grandes fuorças.

Multinacional piensa adquerir l Nuobas i crear mais un blog de l género!


Diç que hai ua multinacional de la área de l biento e de l'aire que stá anteressada an mercar la redaçon deste mui afamado blog!
Cun eso, aspera-se que seian çpedidas bários repórteres desta redaçon, ya que a la bista de ua multinacional, hai uns quantos que eiqui andan mas nunca scrében nenhua nubidade! Pur eso, para bós repórteres, se nun quereis ser çconectados de l blog, antrai ne l actibo! (Ls çpedimentos serán para ls que nun screbiran nada ya ha un cierto tiempo).
Stá-se tamien a projetar ua nuoba eidiçon deste grandiosamente afamado blog, mas para ls assuntos de afuora de la nuossa linda aldé! Bai-se a tratar de un blog de nubidades de interesse nacional i einternacional! Cun nuobas, crónicas e todo e todo! Pur isso, stan abertas las candidaturas e anscriçones para ls repórteres que quejiren participar ne l nuobo projecto!
Pur las palabras de um de ls persidentes de la multinacional: "este blog yá mostrou que se puode falar mirandés, screbido, sien falar simpresmente de ls sachos e de la bina. Agora ls nuobo passo para este grupo de scritores de tiempos lhibres ye mostrar l mirandés na bida actual e subre l presente de l mundo an que bibemos". Só para quien quejir, claro! Stá abierta tamien la çcusson para l nome de l feturo blog!

13.7.06

Botaçon "L que stá malo cula fiesta de sta. Bárbela"

Diç que hai algo de mal cula fiesta de sta. Bárbela (cumo todos ls anhos), pul que muita giente a bezes decide de nun ir alhá, pur mui bariadas i bálidas rezones.
L que proponemos agora ye ua botaçon para amberiguar l que stá malo cula fiesta d'astanho.
Nun bos acanheis, amigos cunterráneos! I se birdes que hai algua outra cousa que stá mala ou ua outra rezon para nun ir a la fiesta deixai-mos un comentairo! Tamien hai un cuncurso pa la rezon mais bálida.

P.S. Eiqui na redaçon hubo quien quejisse sperar pula data eifetiba de la fiesta, mas apuis cheguemos a la cuncluson que essa anformaçon ye eirrelebante pa las críticas.

Apresentaçon an antemano de l programa de la Fiesta de Sta. Bárbela!


Diç que ls repórteres deste mui afamado blog ya tubirun anformaçon de l que puoderá ser la nuossa gradiosa Fiesta de Santa Bárbela!
Inda nun se sabe al cierto an que die bai a ser, pur dous razones: diç que ye porque inda nun se decidiu, e tambien porque se stá a la spera de l resultado de l referendo para decidir se bai a ser a la semana ou ne l fin de semana, purque l'anho passado tubírun porlemas (ou fui por cousa de un cartaç, la redaçon yá nun s' alhembra..). Deç-de yá se abisa que quien tubir oupeniones que las ponga eiqui, para ls mordomos beniren a çcutir-lo tamien.

Diç tambien que ye capaç de benir ua sorpresa para la nuite, benirá de l outro lhado de l Atlántico! Al cuntrário de l que 65% de ls besitadores de l blog starán a pensar, nun serán strippers! I tamien para ls outros 35% nun quedaren a pensar, tamien nun serán stripers homes! Tambien nó, para uns 2%, nun seran homes/ties transexuales strippers!! Pur anquanto queda an segredo, anquanto la mordomie sigue cun las negociaçones. Soube-se a cachico na redaçon de l blog que alfinal ls Xutos & Pontapés (Patadas i Puntapies an mirandés) nun ban a poder star, cun muita pena deilhes, dizen, purque agora só se apresentan al bibo an las Queimas (de sponjas cinzentas) por ende afuora.
Bamos aton a sperar pur mais nuobas subre la fiesta, que se spera star chena de giente, e adonde se ban a fazer debertimentos a la tarde para ls mais nuobos e tamien para ls grandes (a la nuite tardie cuntinua l debertimento d'ua maneira un cachico diferente) . Bai-se tamien poder porbar la boída tradicional desta tierra, apreciada pur toda la Çeita, que ye l bino i la cerbeija, que diç que salen bien acumpanhados cun uns entremoços bien curados!
Bai a ser de refinfa l malho la fiesta!

9.7.06

La eimbason d'l Moto Club de Fuonte Aldé

Diç que yá está a ser preparada la primeira eimbason por parte d'l recente moto club de Fuonte Aldé, que stá marcada para ls dies 29 e 30 deste mês en Sendin... Cumo se puoden ber p'las eimaiges de la imprensa local ls treinos i preparatibos yá ampeçoram. Diç la giente de la tierra i l "Mequinhas" (que yê l duonho de grande parte de las tierras i sobreiros de la trindade) cun quien stubimos a la cumbersa, que cada beç ten menos tierras pra lhabrar, pus ls motoqueiros stan eilhes a fazer l serbiço...Quien num anda nada cuntento son ls respunsables de la junta porque andebiran a cumponer ls caminos, i estes motoqueiros agora andan a çcunjunta-los outra beç. Sabemos tamien de fuonte bien segura que l sócio numaro un d'l moto club, pra quien inda nun sabe, yê l tratorista, mas que yá fui motoqueiro (dizen até ls specialistas que fui l maior de todos ls tiempos), mas que nunca deixou de ser tratorista, porque siempre fiç questão de lhabrar todo por onde passaba. Diç-mos el que stá muito orgulhoso d'ls sous seguidores mas que inda tenen muito para daprander...
Juntaibos ls buonos que agora yá sabeis onde quedan!!

5.7.06

L famoso anónino zaparciu


Diç que zaparciu l famoso anónimo que comentaba este blog, quien l ancuntrar, diga-le que ya stamos a screbir i puode benir a falar mal de nós outra beç (mas an mirandés).

4.7.06

L Clube d´ls "Sidrosos"




Diç q' an Founte Aldé, la tierra an la qual naide gusta del ( ai l bino, l bino), i adonde a par d´las outras tierras bezinas, nun hai bino de maçana, aqueilhes rapazes balientes cumo son par´estas cousas d´l bino, ban a criar un noubo clube, que se antitula "LS SIDROSOS".
Apuis de staran este fin-de-semana an las Asturias i adonde s´ancharcoran dessa cousa de la sidra, dçidiran fazer alhá un cuntrato d´esclusibeidade culs produtores e çtribuidores desta marabilha que sale de la maçana. Assi este clube será l unico por aqueillas bandas del praino mirandés. Bamos a ber s´l clube anpeça a crescer bien depriessa, yá cunta cun seis eilementos, onde tods ei-lhes tebiran que passar por ua prouba mi dura, que apuis nun se trata nun die.
Las inscriçones yá stan abiertas. Nun pierdas tiempo.
Fourça Sidrosos...

Lhiberdade de eispresson amenaçada an Fuonte Aldé

Diç que la rezon pa la falta de nuobas neste blog son las amenaças que giente de la nuossa tierra fizo als blogueiros.
Puls bistos, hoube giente a quien nun les quedou bien las postas eiqui scritas i amenaçórun l'antegridade física d'ls nuossos repórteres. Citando un tiu: "Ai se you sei quien screbiu aquilho... Nun sei quei le faga...". Anque yá fui há quantago, la berdade ye que quaije naide bolbiu a screbir algo eiqui, i claro, las amenaças parórun.
L que ye mais curjidoso ye que ls çcuntentos cul blog i ls que nun gustórun nada d'l que se postou eiqui son personas que nunca benírun acá para ler las nuobas. Ademais ni sequiera sáben que todas las puostas stan assinadas, pul que querendo, lhougo se sabe quien son ls outores.
Bamos lhuitar contra l'oupresson na nuossa Terrica!
Adelantre Camaradas! Cumo dezie aquel tiu, nun sei donde, alhá pals lhados de la capital (Lhisboua, nun ye Madri).

20.6.06

La cluobra de la Lameira


Diç que la cluobra de la lhameira comiu la lhéngua als fazedores deste blog...
I tamien al crítico oufecial deste blog que sien nós a fazer algo, nun puodo screbir mais nada pra criticar.

5.6.06

Afinal nun ye diç que...


Este sábado que passou (díe 3) si stubirun a filmar an Fuonte Aldé.
L filme ye ua curta metragem sobre mineiros.
Stubirun a filmar an baixo dun carrasco alhá pal Recuostro an pie de la ancruzelhada.
Quien filmou fui un grupo do Porto que se chama Circolando.
Hai que dar que falar de Fuonte Aldé nien que seia bien!!!
Esta si nun ye "diç que"...

4.6.06

Moto Club de Fuonte Aldé

Stan a ser eilaborados ls statutos para criar l Moto Club de Fuonte Aldé.
Este será çfrente de ls demás, solo seran admitidas motas de grande porte como las que stan no retrato de la notícia anterior.
Assi que yá sabeis, quereis ser associados? mercai motas destas, you yá stou a spera de ua.

2.6.06

Maclino compra ua mota!!!!!




Diç que Maclino cumprou ua nuoba mota, pus yá deberie de star farto de andar de citroen! Hoije diç que yá fui deiqui a sendin.
Agora nun hai quien l pare!!!! Ran....Ran....Ran......

Biba Fuonte Aldé!!! BIBA!!!!


BIBA!!!
BIBA!!!
BIBA!!!

1.6.06

Nuoba anfardadeira an Fuonte Aldé

Diç que l tratorista de Fuonte Aldé ha cumprado ua anfardadeira nuoba, pus el ya deberie de star farto de ber a Pera de Dues Eigreijas a anfardar an Fuonte Aldé. Ls anformadores dizen que la tenie ido hoije a besca-la a la oufecina, pus debie de precisar de rebisones.
Agora só bai a ser anfardar!!!!!!!

31.5.06

Diç que las obras de la Central ya ampeçorun


Eiqui damos la proba prubada del ampeço de las obras pa la futura Central Nuclear an Fuonte Aldé.
Ls motores de las máquinas yá roncan!!!
Falta puner la pala del trator, mas diç que só na segunda fase ye que fai falta, agora hai que fazer outros serbiços.
Ya se bei un remoque cargado de material radioatibo...

28.5.06

Nuoba tecnica de anfardamiento zambolbida an Fuonte Aldé


Diç que ye cun grande honra que se apresenta eiqui ua nuobidade na ténica agricula de las tierras de miranda! L cunhecido tratorista e tenico de maquinas agriculas de Fuonte Aldé, apuis de star durante ua semana arrecuolhido a amanhar la sue anfardadeira, ampeçou ya a uns dies l anfardamiento de la bena e feno de bários clientes sous. Tal nun fui l spanto quando la giente biu que se fazie stória naqueilhes momentos, porque ls fardos benian todos pegados uns als outros!
La ténica einobadora permite assi transportá-los puxando apenas un. Ya ls bielhos nun ténen que cargar ls atrelados chenos de fardos, chega bien puxar cul trator un que ls outros bénan todos seguidos.
Esta ténica quedou coincida como ls fardos "berrugos". Cumo toda la giente sabe son ls berrugos que caminam todos pegados culo cun boca uns als outros!
Yá sabeis! Agora nien fardos redondos nien ls retangulares, agora la moda ye Fardos Berrugos(tm)! Nun anfardador pierto de si!
Tengo dito!

26.5.06

L grande home de la pala


Diç que este home ye sin dubeda ua referéncia an la aldé. Home mui fuorte e baliente, destemido e siempre pronto a ayudar a la fiesta siempre que chaman por el.
Ten sobrebibido hai yá alguas geraçones. Son poucos an la aldé que nun lheborun cun la pala bien assente n'ls “fucinos”. Este home ten tantas mas tantas stórias que serie preciso fuolhas de la gruossura de las que el usa an su juornada de trabalho, pra que l lhibro nun ficasse mi grande.
Yé tamien un home fiel i que acompanha siempre ls de la aldé quando se deslocan pra fuora dei-lha. Se bíssades l qu'este home trabalhou l anho passado an Madrid, nunca habie bisto a naide trabalhar daqueilha maneira (nien a miu abó camposino, quando s'anrraiba an la binha).
Sin dubeda l padrino i padroneiro de Founte Aldé.
Tenemos que arranjar un altar an la eigreija para el.

Nun percan l próximo eipisódio de l home de la pala, porque nós tamien nó!!!

Pra l bien de l "diç que"...

Antes de más, muito oubrigado por todos aqueilhes que consultan cun freiquencia este marabilhoso blog. Mas, bisto isto ser un blog da la tierra, alimentado por pessonas da la tierra, era bouno que deixássemos a la indescriçon, la ansensateç, l chaubinismo, i ampeçassamos a ber isto cumo un lhugar de “culto” (bai a ser nun feturo proximo), de la nuossa magnifica i sublime aldé, de la lhéngua mirandesa i acima de todo un lhugar que atrai las pessonas pul sentido d'humor bien patente an todos ls posts. Por isso i para que este blog cuntinue a funcionar an la perfeiçon, por fabor, eidenteficai-bos cada beç que fazeis un comantário, nun custa nada, puis nien ye preciso star registado. Que sin dubeda, ayuda i muito l bouno ambiente deste blog.

Por todos bamos cunseguir fazer deste blog l mismo que fai la “seita” quando se junta, ou seia, DAR QUE FALAR!!! J

Más ua beç oubrigado a todos.

I biba FOUNTE ALDÉ, BIBA!...

24.5.06

Hora de las missas bai a ser mudada


Diç que l cura bai a mudar la hora de las missas de deimingo.
La hora prebista será antre las 6.00h e las 7.00h de la manhana todos ls deimingos.
Todos sabemos cumo l cura gusta de ua boç bien timbrada a ler las leituras, mas cumo a la hora que la missa ye, ls nuobos nun stan pur muitas i (a)bariadas rezones.
L cura butou-se de cuontas i chegou a la cuncluson que esta serie la melhor hora purque ls que drumirun ya se lhebantórun i ls que benen de Miranda de l Intalaia chegan mesmo a tiempo.
Rapaziada: nun hai çculpa para deixardes buosso pai i buossa mai anrraibados!!!

Pesca çportiba na lhagona de la lhameira

Diç que stá para brebe um grande torneio de pesca çportiba, na lhagona de la lhameira.
Cumo sabeis, la lhagona de la lhameira stá chenica de peixes, you nun ls conheço pu'la marca,
(marcas só de carros e mal), mas ls antendidos de l assunto dizen que son sardinas, chicharros, lúcios, ach...nun sei quei, tubarones i parece-me que yá bírun alguas baleias.
Grande suorte fui haberen alhargado la lhagona, porque se nó yá nun cabien alhá.
Quando sinten barulho, diç que se ponen todicos a la flor de la auga, como se stebisse a spera Santo Antonho pal sermon.
La notícia fui debulgada na agencia Luzia que ye cunhecida por todo l mundo i todos ls canals spanholes ban a star presentes para este eibento.
Ls pertueses nun puden benir, diç que porque las stradas stan mui malas, tenen muitas curbas e la gasolina stá mui cara.
Mirai la suorte que tenemos nós an star tan acerquita de la Spanha!

23.5.06

L cartaç de la fiesta de la Trindade


Eiqui bos deixo l cartaç de la fiesta de la Santíssima Trindade que como sabeis ye die 10 e die 11 de Junho. Spero que gosteis.

Carregai an la image pra ber melhor.

La imprensa de Fuonte Aldé stá siempre n'l lhugar cierto a la hora cierta!!

Diç que a las nuites (i dies), la jubentude gosta de beber ls sous copos. Este die quando stában a salir de la cuopratiba pra ir até l'Intalaia, la "boate" de l questumbre (disputeca cumo muitos l chaman), alhá staba a spreitar la tie de l jornal, para no die seguinte tener las nubidades calenticas i prontas a spalhar pur l'aldé. De quei se habien de lhembrar aquels gandulos? Querien cumbidar la tie para ir cun eilhes, chegórun mesmo a apostar ua grade de cerbeija cumo nun tenien curaije para la cumbidar!
Buono, muito çcutírun i naide ls tube no sítio para la cumbidar, aposta que tenien miedo que benisse a cuntar a sous pais quien éran las sues "bechigosas"...
Quando bolbírun, parece que inda traíen sede i tornórun a abrir la cuopratiba (porque cun la sede nun se brinca), mas pal sou spanto, tenien porteiro, era um rapaç que se iba a çpedir de la "Taberba Fuora d'Horas" que cumo ya se sabe bai ser bendida. L rapaç querie lhebar uns mantimentos pa la nuite, pus iba alhá a stear-se, relhembrando ls bielhos tiempos i spedindo-se assi de la taberna. Bie-se ne l sou rostro que staba triste i desolado cun tal destino de la taberna, yá que desta beç nien sequiera tubo buntade d'ir a ua lheinha a saber dun capão i uas menudas (tantas bezes tio camposino mos quijo acusar de l tirarmos) para fazer lhume i assar uas chouriças para ajudar a amarrar l bino!!
Mas rapazes, estes boubicos son muito supriores a bendas, OPA's i todo, pur isso num hai que temer!
Haba salude que estes gandulos dan cuonta de l restro! Ah Mai ah Mai!!!

22.5.06

"Cuornos d'Auga" - ua nobela mirandesa


Diç que se bai a rodar un filme nel balhe de Fuonte Aldé, cumo yá fui adiantado nel nuosso blog. Mas na berdade nun será un filme mas si ua nobela, de nome "Cuornos d'Auga".
Apuis de la agitaçon cousada pula OPA, i la publicidade que bieno cun eilha, Jesé Eiduardo Moniç, l director de la TBI quijo aporbeitar la fermosura de l nuosso balhe para la 7ª arte.
Diç que la nobela cuonta la stória de un amor proibido. Amor este antre un bui mirandés i ua baca turina. Él, cubridor-mor de un stábulo de criaçon de ganado mirandés. Eilha, simpres baquita de mouge abantajada, cun muito lheite para dar, i culs suonhos de qualquiera rapaza: coincer l sou touro ancantado.
Sabe-se tamien que l casting stá agora a decorrer, alhi nel balhe de riba nel stádio de las campaninas. Ajuntou-se ua multidon bovina mui grande, todo cun ganas de ser la próxima super-streilha, para mostrar ls cuornos ou la mouge na telbison pur esse mundo afuora. Tamien pur causa de ls cuornos afilados teme-se que puoda haber zaragata, mas nada que ls famosos domadores de ganado Bito e Antonho Manel nun saiban controlar.

21.5.06

Un mês e un die de fiesta!

Diç que stamos a la puorta de la Trindade, e ye berdade! Ls mardomos astanho prometiran ua grande fiesta e ban a cumprir. La fiesta dura un mês e un die. Quien quejir puode cunfirmar, bonda ler l cartaç (10 de Junho a 11 de Julho).

Biban ls mardomos!

18.5.06

Diç que ban a fazer ua central nuclear an Fuonte Aldé

Ls menos anformados cuidan que ye l Cunjunto de Sendin “Núcleo” que bai a fazer ua sala d’ansaios an Fuonte Aldé, mas ls que yá birun l projeto, diç que la ban a fazer an frente a la Associaçon i apurbeitan las fundacones del cureto adonde tocaban antes ls cunjuntos. Agora cumo todos ls grupos de música yá traien palco, aqueilha grande obra de angenharia d’oupenioun stá sub aprobeitada (guardan alhá ls rachones del fugareiro, bien sabeis, nó?)
La localizaçon de Fuonte Aldé ye stratégica purque stá cerca de la strada nacional i ten l camino de fierro, que quando abriren outra beç la puonte del cambóio (quien bai pal nabalho) todo queda ouperacional i nistante la einergia chega a la capital.
An buona hora Zéfiro negociou este grande ambestimiento pa la nuossa tierra, ls outros Presidentes de Junta tamien l querian mas chegorun tarde… Zéfiro nun drume.

11.5.06

Fiesta dels Sartigalhos


Díe 8 (uito) fui la fiesta dels Sartigalhos, lhembrais-bos?
You inda fui alhá a ber l que se passaba, mas nada...
Quien tebir mais anformaçones sobre tan amportante fiesta que dá l nome als habitantes de Fuonte Aldé, agradecemos.

10.5.06

Adius taberna "Fuora d´horas"

Diç que la taberna "Fuora d´horas" yá nun pertence a naide de Fuonte Aldé, mas si a ua tie de Sendin que la cumprou, parece que essa tie gusta muito de burros! La taberna puode se tener ido de Fuonte Aldé, mas ls momentos buonos e bárbaros que alhi passemos ( ai l bino l bino*), esses nunca se ban a ir, pus biberan eiternos nels nuossos coraçones e an las nuossas más bibidas recordaçones. Muito oubrigado taberna "Fuora d´horas" por teneres fazido parte de la nuossa bida.
Ne l fim de ler isto, fazei un minuto de silencio, an memória de la siempre soudosa taberna "Fuora d´horas".

* Se fuossa só l bino! :)

Buieiros lhançan OPA al balhe


Diç que ls dous maiores buieiros de Fuonte Aldé lhançórun ua OPA (Ouferta Pública de Aquisiçon) a todo l balhe de Fuonte Aldé, cumo chubiu muito, diç que: “…las bacas paçen bien i antretenan-se melhor purque beian passar ls carros. Ls lhameiros são mais paradotes i sien mubimiento”, afirmou un dels baqueiros (nun cunfundir cun banqueiros).
La stratégia studada para esta OPA i mantenida an segredo até hoije, ye la seguinte:
Antonho Manel queda cul balhe de riba incluindo l Stádio de las Campaninas i l brincadeiro de ls garotos cun sítio pra merendas adonde se puode assar un bui anteiro dua beç.
A Bito calhou-le l balhe de baixo, diç que pur tener mais selombras i assi puder usar mais bezes l xaragonico que Xande l dou. Lhembramos-bos que él l lhieba siempre anroscado nel guiador de la bicicleta cumo se fussa un terço nel speilho dun carro.
La frunteira del balhe fui riscada pul passadeiro de Balongo, diç que l GPS de l carro nuobo de Bito marcaba l meio nesse sito.
Las bacas mirandesas cuntinuan assi a anfeitar esse que ye un de ls sítios mais guapos de todo l Planalto Mirandés.
An ultima hora soubimos que stá pra brebe la rodaije dun filme nel balhe de Fuote Aldé.

6.5.06

Segada Ampeçada!!!!!!!!

Diç que la segada ya fui ampeçada! Astanho la segada fui ampeçada por outro! Desta beç fui tiu Eidoardo Sendinês al pioneiro, al cuntrário de ls outros anhos que era l tratorista de Fuonte Aldé, que a esta altura de l campionato inda só sta a amanhar la sue maquinarie, que al cuntrário de ls outros anhos era el que ampeçaba! Que anho este, bai todo al cuntrário!!!!!

4.5.06

Bamos a medrar

Ah rapazicos! Fuonte Aldé bai a medrar, yá hai mais giente de fuora a cumprar casas no lhugar.
You la certeza inda nun la tengo, mas yá oubi rugir por ende que si que ye berdade. Quedai çcansados que lhougo que l souber bos cuntarei todo.
Bós que andais por fuora, agabai-mos, puode ser que bengan mais.

2.5.06

Cousas curjidosas

Diç que alha riba nun sei adonde hai un santo, que diç que dando-le nun sei quei ganha-se nun sei quanto

Isto diç-se an Fuonte Aldé

1.5.06

Zé Francisco mercou un trator nuobo

Diç que Zé Francisco mercou un trator nuobo. Inda naide lo sabie, ora nó?

29.4.06

L causo de las roncadelas pur la nuite adrento

Diç que las ties todas çcuten antre eilhas quei passa culs sous tius, porque pur la nuite, a las bezes scuitan uas roncadelas, que, él hai cousas, ye costume calharen pur las mismas horas que fecha la associatiba. Ua tie, anterrogada pur la nuossa comitiba, que quijo mantener la eidentidade scondida, pur tener medo que le chegassen la roupa al pelo dixo: "cumo quiera ye l miu home.. él a drumir fai uas tronadelas que a bezes rezo a Sta. Barbela! Nien sei se ye a ressonar ou ye pur baixo, mas que trona, él trona!" Yá outra tie dixo: "you acho que nun ye l miu tiu... You sei que él ressona, a bezes parece que bota la casa abaixo, mas sinte-se alhá fuora! Nun será él, nó!" Eilha apuis dixo que serie ua bezina (que tamien num podemos poner l nome, como a la purmeira, por starmos a falar de la misma persona). Este causo yá se çcute fai uas dous semanas, cun tantos dies cumo las oupeniones que registramos de ls bielhos. Chegou a dezir outro tiu que serie l demonho ou ua mari-manta, porque se iba sentindo tronar siempre de baixo de l pobo pa riba, diç que bai pa l semitério. Causo mui squesito, porque ye siempre quando yá todos ls bielhos stan na cama!
Benimos a saber inda à cachico, pur fuonte anónima, apuis de um grande studo, que afinal ye solo l carro de un de ls taberneiros de la associatiba, que recentemente mercou ua panela pa l sou carro, para fazer mais bruído, que stá a ser transformado num carro tuninho, yá ten ua lhuç azul e todo. Apuis de la çcoberta anterroguemos un bielho que mos dixo: "ah tonticos estes garotos! Que se amborrachen ye ua cousa, mas agora que nun mos deixen dromir isso yá nó!"
P.S.: Nesta reportaige oumitimos todos ls nomes de ls anterbenientes para nun sofreren oumilhaçones ne l pobo.

26.4.06

Aparciu um nuobo blog de la actualidade mirandesa

Diç que se stá a porparar um blog de qualidade para serbir a toda la quemunidade blogger de l mundo cun las últimas notícias, cuntas e trobas sobre l Praino Mirandés . Segundo la direçon deste afamado blog, stá-se neste momento a proceder a la requolha de correspundentes e jurnalistas. Promete la direçon que l blog stará de plenos poderes dentro de ua semana: "ye cun muito prazer que ponemos an prática este serbiço inobador, pra que toda la quemunidade mirandesa puoda star actualizada de las notícias de sue tierra, serbindo-se de un blog", diç la direçon cun muita proua!