29.10.07

Fin de la lhéngua

Diç que se bai a acabar la lhéngua mirandesa...
Yá oubimos dezir que la "doença de las bacas loucas" an mirandés, "las bacas malas i tourondas" chegou a la Tierra de Miranda. Quien l diç ye ua doutora de la Ounibersidade de Poço Redondo que abisa que se comirmos muita lhéngua de baca mirandesa (seia an guisado ou anchouriçada)puode lhebar a la stinçon desta famosa iguaria.
Ponei-bos listos i fazei cuidado.

27.10.07

www.pauliteiros.com

Diç que yá stá de nuobo na anternete l sítio de ls Pauliteiros de Fuonte Aldé, cun la direcçon www.pauliteiros.com. Ye l nome más facil pra nun dar cumplicaçones a naide que tenga memoria curta.
Alhá podeis ber las carochas de todos eilhes, uns poucos que son tamien scritores neste periódico de tiraige cunforme las nuobas que aparecen.
Podeis ber tamien las nuossas roupas de beiladores, oubir uns lhaços e saber adonde se bai a beilar debrebe. Ah Camposino, podias tamien poner fotos de outros sitios, cumo l'Alemanha, Fuonte Aldé, etc...
Buonas cousas fai la mocidade de Fuonte Aldé!

21.10.07

Menos un menumento para Fuonte Aldé

Diç que oubirun dezir que ban a sbarrolhar l coreto ne l parque. Essa magnifica obra da arte cun l'arquitectura de uns quantos que nun sabien mui bien cumo era, mas cun muita buntade e sabedoria para todo fazer, bai a ser sbarrolhada prossimamente, inda nun se oubiu dezir para quando será, mas ye cerca.
Esta obra fui usada inda un par de bezes, mas hai 5 ó 6 anhos que solo sirbe para guardar ls rachones de la associatiba i acolher familias ciganas. Ye portanto assi cumo un cabanhal mas moderno de la arquitectura falada anriba.
La berdade ye que ne l pobo stá quaije toda la giente de acuordo purque yá nun serbia para nada e só criaba piolhos e carunchos. Digo quaije toda la giente purque yá se sabe, quando se faç algo, hai siempre quien seia de l contra. Assi, cul sbarrolhamento, por eisemplo, tie Furmina yá bai a poder ber de casa quien chega na carreira, sien tener que ir pa la rue de baixo. De la misma maneira you yá bou a poder ber la spanhola durante todo l camino que faga de sue casa a la casa de l'abó de las saias!(Nun ye que steia mui anteressado, mas ye solo para dar outro eisemplo).
Ls que nun gustórun de la notícia yá marcórun ua manifestaçon de protesto contra l sbarrolhamiento. Speran-se assi portanto uas 20 famílias ciganas, la metade deilhas, antigos usuários de l coreto, i la outra son parentenas de ls antes citados. Spera-se an special la familia de l tiu que ten 11 filhos, dous deilhes rapazes, porque agora las rapazas yá starán an eidades casadeiras. Será assi ua de las oucasiones que Fuonte Aldé tenerá mais rapazas na tierra.
De l campo que quedar adonde stá agora l coreto, you aperponia que se fazissa un campo çportibo de l jogo de la belharda! I apuis ourganizábamos l purmeiro torneio regional de la belharda...

Ouserbaçones sobre la ampermeabelidade de las berças


Féleç - Cumo tireste anton la berruga de l nariç?
Zé Luís - Cun berças!
Feleç - Cumbersas?! Mas cumbersas cun quien?

15.10.07

Fuonte Aldé na TV GLOBO


Biban todos!
Un díe destes falorun-me dun bídio que stá no sítio de la TV GLOBO del Brasil, i que fala de la lhéngua mirandesa.
Yá l bi. I quedei mais admirado inda, purque la eimaige que aparece na apresentaçon desse bídio ye la placa que diç Fuonte Aldé.
deixo-bos eiqui l "link" pra que baiades alhá i beiades esse cachico que fala destas tierras.
Abraços pra todos

La lhigaçon ye esta

2.10.07

Las bacas de Fuonte la Taça