24.5.10

TRINDADE 2010

Yá cheira a Trindade.

Stamos na recta final, i no fim de semana que ben, todos ls funtealdeanos quieran star presentes para la animar.

Speramos que l tiempo mos ajude, porque la nuossa fiesta merece.

Esta nun ye ua fiesta qualquiera, ye ua ROMARIA que se perde na mimória de ls tiempos por las mais bariadas rezones:

Nun se benera un santo qualquiera, nós fazemos la fiesta en honra i loubor de Dius en toda la Sue plenitude, la Santíssima Trindade, PAI, FILHO i SPRITO SANTO.

Ye ua fiesta singular, onde las mocidades de las aldés bezinas se ajuntam i cada ua a la beç dan rondas a l redor de la capielha, , cantando, boziando i dando bibas en franca alegrie.

Ls tiempos de la porrada, por la qual era tristemente conhecida yá passou, por isso nun tengades miedo, benie acá que sereis bien recebidos i tenereis ouportunidade de assistir a ua fiesta que se çtinge de todas.

Para acabar bou a poner eiqui um soneto que fiç l'anho passado por oucasion de l'ancontro de bloguers de l Praino que se rializou justamente no cabeço de la Trindade.





CABEÇO DE LA TRINDADE

Alto cabeço de berde forrado,
Guarda de l Praino, fiél çantinela,
Bés-lo anteirico dua miradela
I anté la Spanha que tenes al lhado.

Medra an tou lhombo tan rico muntado.
Mora na tue crona an casa singela,
Feita de piedra sin ua jinela,
Dius Pai, Santo Sprito i l Filho houmanado.


Fuste terreiro de guerras i amores
Quantos segredos nun guardas p´ra ti,
Suspiros, gemidos, bózios, delores...

Xaras, sobreiros, selombras i flores
Nácen, crécen i florécen eiqui
I cántan alegres ls reisenhores.

9.5.10

8 de Maio Fiesta de ls Sartigalhos



8 de Maio, la mais tradicional i nun menos amportante fiesta de la nuossa tierra. La fiesta de ls sartigalhos.



Nós fuontealdeanos sabemos i antandemos la carga mística que esta tradiçon ancerra, mas para quien nun sabe solo digo que este die ye sagrado an Fuonte Aldé, que cumprimos na medida de l possible ua bielha promessa de ls nuossos antepassados i que la tradiçon stá biba, de salude i que se requemenda.



Astanho apesar de calhar an sábado i muita giente tener ouportunidade de partecipar na missa, la eigreija staba chena, l tiempo nun mos deixou fazer la precisson a l redor de l lhugar cun la Eimaculada Cunceiçon por bias de star a chober, inda assi, ls mardomos pegoran no andor eigreija abaixo i l cura fiç las eiséquias de abençoar ls campos mesmo a la puorta de l campanairo.



Finda la missa i porque chubie nun se puode fazer la fiesta no sagrado, de maneira que toda la giente se zlocou pa l salon de la junta onde se quemiu i bui l que ls mardomos oufereciran a toda la cumnidade. Bino, roscos i antramoços i todos quedemos bien cuntentos.



Grande fiesta! Onde dan a quemer i a buer que mais podemos pedir?



Biba Fuonte Aldé.