18.3.08

Nuobidades nuobidades....

Diç que yá se passou un més anteiro zde la última beç que purqui se screbiu. L antigo anónimo buolbiu solo para dezir todo cuntento: "L blog morriu"
Pus esso nun ye berdade, i eiqui stá la pruoba. Nun ye grande cousa, mas stou a amparar la nuossa redaçon para que nun se sbarrolhe, a ber se ben ende outro(s) para que nun quede cansado.
Pus cumo bos alhembrais, l anho passado, pula misma altura passou-se l mismo, e dessa beç tube que cuntar que nun habie nada de nuobo na nuossa tierra pequenhica, pus se era berdade....

Nun bou agora a bolber a dezirbos que Tartamon cuntinua cun las mismas botas de l tiempo de ls bornais, porque isso yá todos l sabeis.
Bou-bos a dar dues nuobidades: La purmeira, que tenemos outro cunterrâneo, tamien screbidor deiqui, eimigrado pa la Spanha, a biber la buona bida que nuestros hermanos mos oufrecen a quien queira. Aparte deste rapaç, yá teniamos outro ne Republica Checa, i outro an Spanha. Stou solo a falar de ls de la mocidade casadeira agora.
La outra nuobidade ye que tenemos acá a bibir un cigano. Tengo muito respeito pula sue etnia cumo la de todas las etnias que hai ne l mundo, mas stando acá isto tan fraco de nuobidades, hai que scarbar por qualquiera cousa.... Anton diç que l cigano stá a bibir alhá para riba, nua casa de berdade. La rezon ye porque agora l coreto sirbe de curralada para poner ls rachones que Luis lhieba para la Cupratiba. L coreto era, cumo todos sabeis, la penson de un inchente de familias que benian purqui a fazer l que la sue bida ls mandaba, i agora passou a curral de lheinha. Yá nien hai giente que rouba rachones nien pitas, nada... Cumo stá la nuossa tierra de zambolbida!

4 comentários:

Zeek disse...

Son ua cambada de treidores, esses que se ban para outras tierras strangeiras, donde la giente nien fala dreito!

stoubados...
pffft

Fallen, The Countess disse...

É... Esses moços de agora que viajam para Espanha e tal... Madrid ouvi dizer... É... traidoooores, traidores... Tss,tss, continuo à espera de ler umas historinhas e tal...

manel disse...

Nun ten nada que ber cun l que escrebi, mas staba a ler agora de nuobo, e arreparai nua cousa: Tartamon... ye nome de faraó de l tiempo de ls eigípcios, nó? Tartamon....
La pirâmide de l grande Tartamon...
Pronto yá agmitei l que me iba na cabeça

Félç disse...

Ah Manel que gaseado andas home, nun bés que esse era l Tutankamon! Bamos mas ye un desafio a ber quien le saca um retrato quando lhieba la canhona na mota e ls cordeiros çpindurados de l guiador?
Quien tebir la felçidade de tirar um an buonas cundiçones, inda s'arrisca a ganhar algun prémio desses de fotojornalismo e quien sabe até l puoda bender bien bendido.