20.1.08

Matáncias


L poema yá nun ye nuobo, pode até ser que yá haba quien l conheça, mas hai muitos mais que nun l conheçan.

Screbi-lo an 1995

MATÁNCIAS

Lhougo a la pormanhanica
inda las teilhas stan brancas
you deitado en mie camica
yá uobie uas chamancas.

-Será tiu Foustino?
pergunto-le you a la tie.
-El querie matá'l cuchino
mal se fazisse de die.

-Scuita!... stan a chamar!
-lhebanta-te que ye tie Custância!
hoije fai-mos madrugar
por bias de la matância.

Las facas stan aguçadas
la cuorda ten l nuolo dado
las palhas stan bien guardadas
l talho stá porparado.

Na curteilha stá l cuchino
sperando la triste suorte,
de ser preso pul çufino
e arrastrado pa la muorte.

Pegamos no probe bicho
cada un por onde l calha
i l sangre sal lhougo en spicho
al spetar-le la nabalha.

Ben tie Custancia a correr
trai un barrenhon nas manos,
l sangre stá-se a perder
i eilha quier fazer chabianos.

Ronca i scoucenha tamien
i pensa l probe animal
todo l'anho a tratar-me bien
i fáien-me agora este mal.

Para chamuscá'l cuchino
fai cada un l sou fachuqueiro
de ls cuolmos que tiu Foustino
tenie colgados no palheiro

Un tira las caçcanhetas
apuis de bien chamuscadas
i you meti-las nas jaquetas
qu'habie pu'lhi çpinduradas.

L cuchino staba cebado
tenie buono toucinico...
-Las bóbedas de Fuont'al Prado
quemiu-las todas él solico!...

- Ten buonas tripas tamien!
- i ls lhagartos que balientes!...
quando tiran para bien
quedan cuntentas las gientes.

I agora pra nuosso sustento
bamos assar las tanrrielhas
i até l gato stá cuntento
que se mos roça nas canielhas.

Las tanrrielhas stan salgadas
i la pinga nuoba apetece
apuis de buonas copadas
senti-mos como yá calece.

"Merenda quemida, cumpanhia çfeita."
la nuossa yá stá quemida.
i cada um aprobeita
para s'ir a la sue bida.

4 comentários:

manel disse...

Ah Félç, ya teniamos soudades de ls tous bersos tan guapos i galanos!
Sien puodes tener bien proua! A ber se te antusiasmas i buolbes a screbir nuobos!
La que mais me gustou fui la de:
"i pensa l probe animal
todo l'anho a tratar-me bien
i fáien-me agora este mal."
Cuitado de l cuchino que bien la sabie!

Qualquiera die fago ua musica cun alguns de ls tous bersos!

Anónimo disse...

Ah Félç, num sabie you d'la tue beia poetica... Si señor tienes jeito...
Quanto a la binda al Porto propara al bilhete que la maré está a encher... :)
(C.C.)

AF disse...

Guapos bersos, si senhor. Muitos parabienes.
Quedo a spera de mais i que l beneiro nunca se te seque.
Amadeu Ferreira

Anónimo disse...

Habie un tiempo an que me spertaba culs berres dals cuchines...