![](https://blogger.googleusercontent.com/img/b/R29vZ2xl/AVvXsEgrHj7VVcs1PMKEx3huO5CXcd-C-nY7zuO-IYs-In3X2Jh2PNplKjfwKKa-HbEoez9pbUvWVgqNOopgOlQF4hXOjf2r9oC2wO3BSbUAtynR-B6uwxb0ZY6OR1YrWEo8x7UuoDOt_w/s320/dsc02725.jpg)
Passo a splicar: aqueilhes gaijos quieren acabar cula fiesta de la SS. Trindade. I cumo l ban a fazer? Çpuis de dáren buoltas i buoltas, lhembrórun-se de fazer las eileiçones ouropeias ne l mesmo die que la nuossa digníssima Fiesta. Se esto nun ye ua afronta a Fuonte Aldé ye l quei? A seguir ben l quei? Anstalar todos ls departamentos de la CE ne l balhe de Fuonte Aldé?
Tenemos 3 heipóteses para fazer cun que la SS. nun acabe:
- Marchar subre Lisboua i tomarmos l Parlamento (mas nun cuncordo mui cun esta, la cousa puode correr bien i depuis somos nós que tenemos que barrer aqueilha porcarie to para la rue)
- Marchar subre l Parlamento Ouropeu (tamen nun cuncordo muito, puode correr bien i temába-mos l cunta de la Almanha, Anglaterra, Spanha i Fráncia. Mas possiblemente arranjábamos porblemas cun ls EUA i podiemos zancadear la 3ª Guerra Mundial, i ls nuossos filhos nun ténen culpa que uns tontos afronten la Fiesta de la SS. Trindade cun uas eileiçones).
- Lhebar las urnas para l Cabeço de la Trindade, pedir-le a Ti Dárida para tomar cuonta deilhas (que eilha ja tubo un negócio desses), i fazer la fiesta i botar al mesmo tiempo. Que dezis?
Biba la SS. Trindade, Biba la Mocidade de Fuonte Aldé, Biba Fuonte Aldé!