Uito de Maio, todos ls fuontealdeanos saben l que este die representa para eilhes.
- La fiesta de ls sartigalhos, esses lafraus que un die anchiran de miedo ls nuossos antepassados, baliu-los la Eimaculada Cunceiçon, a quiem prometiran fazer ua fiesta todos ls anhos ne die a que a eilha corresponde se ls lhibrasse daquel terror.
La santa que no mundo ye conhecida por ser tan buona que anté serbiu para ser la mai de Dius i mai de toda la houmanidade, nun iba a abandonar ls sous filhos nua hora de tanta afliçon i cun toda la bondade que se le reconhece, lhibrou-los daquel termento.
L pobo nun la squeciu, nin se squeciu de la promessa i todos ls anhos la benera neste die cun missa cantada i precisson.
La ACREFA ten benido yá bai para quatro anhos,a fazer ua proba de binos a que l chama PIÇARRON, nós todos sabemos onde queda l Piçarron i como ye neste sítio onde hai mais i melhores binhas, alguien se lhembrou de l dar este nome a l'eibento.
Na mie oupenion, este fui l melhor anho de las probas, embora nun se puoda dezir l mesmo de ls binos. La grande maioria deilhes, i fuoran apresentados binte dous, staban doces i nun tardaran, segundo la oupenion de ls antandidos, a staren buonos para la selada, i fui l melhor anho de las probas, porque stube no juri, antre outros, un grande specialista na matéria. Angenheiro Juan Berdial, porsor de l IPB que sabe como naide de binos i probas de binos.
![](https://blogger.googleusercontent.com/img/b/R29vZ2xl/AVvXsEgypeIw5LBRTMw4zw6yBydFhU9yeJelOZQdDouoKq9SF6kqgIIK4lNX2D0Q3QrWCGW3wnFJ8y_cGO6c-_2HjnOxoNYAZ8KE3OHLq7Z1ajJE8H0D2cZ0nbwWrIeU7AFW6J7Vbzvx7w/s320/HPIM8307.JPG)
Ne l final, la ourganizaçon pediu-le para splicar l porquei de ls binos quedaran assi doces este anho i el dou ua aula outentica de como i quei se debe fazer para tenermos bino de qualidade.
![](https://blogger.googleusercontent.com/img/b/R29vZ2xl/AVvXsEgdLDcnWxEypOZi9DCAnEtymbFYwuKfUmsCsDmKDWuIVkDCpMJA61gUU7BLFN0hZ7s-4o6nwc1GFo5Wu065Rd2CA59X3iFSQT7pI3pc9VCgtxi3UgSuKCdr5ID4ah-2jTHZ_UINEQ/s320/HPIM8295.JPG)
Eilogiou la nuossa region i dixe que tenemos tierra, castas i clima para fazer bino de scelência, se nun l fazemos ye porque nun sabemos ou nun queremos.
![](https://blogger.googleusercontent.com/img/b/R29vZ2xl/AVvXsEgL3xeIHTazN21ps_mVEaD8DxA45NlJkTL1VXH7fm1qMkoMPOWWUvc3m1kffQUVYY9refBjbKGsX2kg_2D9wrIrQ8sTledqe7evdGWS_ZEMzC_fMzhECZvat9NkpomAFBdf2FHzXQ/s320/HPIM8342.JPG)
Para acabar en beleza, la associaçon de Sartigalhos Palgrinos, quije apresentar la sue cerbeija, si la sue cerbeija que bai a ser produzida acá na tierra. Toda la giente la agabou i you que nun sou grande a preciador de cerbeija, -
bá! si bebo uas bjecas, mas nin le tomo l gusto, - cunfesso que gustei bastante.
Stan de parabienes ls cerbejeiros.
Cun muita pena, nun tengo retratos de la precisson nin de la cerbeija Sarti.