Santa Bárbela bendita

"Santa Bárbela bendita,
Que nel cielo stá scrita
Cun papel i auga benta,
Lhibrai-mos desta tormenta"


(Ouraçon tradicional que se reza cada beç que atrona)

La fiesta de Santa Bárbela an Fuonte Aldé! (La fiesta de ls Pauliteiros)

Diç que stá ende a chegar la fiesta de Santa Bárbela, ne l dia 25 de agosto, un sábado, por isso nun teneis çculpas para nun benir a la fiesta! Bede l cartaç para quedardes a saber cun pormenores l que se bai a passar.
A toda la quemunidade blogueira, quedai a saber que bamos a fazer un ancontro de blogueiros mirandeses e sien seren mirandeses, aparcei para çcutirmos eideias e anzonas.
Por la nuite adrento, ls dous çcunjuntos ban a fazer un arraial de ls melhores de la region! "Pelo Público" benen de Bragança, cun ua máquina de lhebantar las morales que ye Nuno Fernandes, e apuis, ls "Aquab Entah", un çcunjunto de inspiraçon moçárabe, musicalmente dezindo, cun passaiges pela pop nacional e strangeira, e un toque delebe nas pimbalhadas actuales e passadas, mas siempre cun stilo!
Cumo bedes, stá l gaçpacho porparado para ser ua fiesta baliente, de refinfa l malho!

Ls burros i ls gueiteiros passorun pur eiqui

Nós bimos ls Reis Magos!!!

Fotos: Paulo Meirinhos

Un destes díes l grupo Galandun Stube an Sines cun ls pauliteiros para fazer un cuncerto alhá no Festibal de Músicas del Mundo.

Eimaginai l nuosso spanto quando bimos ls Reis Magos del Presépio de Fuonte Aldé a tocar guitarras eilétricas i calabaças ambulcadas chenas d'auga que fazien sunidos lindos!

Quedemos marabilhados cun las modas deilhes, falaban bien só que nun antandíamos l que dezíen.

Ls Reis Magos i nós

Apuis del nuosso cuncerto i del deilhes stubimos animados para saber de donde benien i cumo acá chegorun. L cierto ie que nun le bimos ls camelos.

Foto: Paulo Meirinhos

Burros i gueiteiros

Ls burros i ls gueiteiros stan a chegar!!!

Ban a ser trés díes de arraials, cumbíbio antre las personas, aulas de bailes, strumentos...

L purmeiro díe será todo passado an Fuonte Aldé a ber se la giente sale a la rúe i cumbibe cun ls que besitan l pobo. Pula nuite habrá un cuncerto del grupo Galandum cun pauliteiros, lhuzes, sonido i todo.

Nuobo Marroquino por Fuonte Alde???

Diç que este die apareciu un nuobo Marroquino na associaçon... Al principio naide l stranhou, l rapaç staba al lhado d'outros dous homes cun cintos i tapetes als ombros, cada un a buer la sue cerbeija... inda perguntoran al rapaç quanto custaban ls chapeus i que so tenie tres ouros no bolso, que era para l Marroquino nun se sticar a pedir... Apuis, passadado un cachico, ya antandiran q'l rapaç nun staba alhi a bander nada...

Ua posta fuora d'época

La redaçon del Nuobas ben por estes meios desearbos a todos un Santo i Feliç Natal, apegados todos ls que gostais!!

Nun stábades a spera desta, nó? Nien sequiera bos alhembrábades deste retrato...
You dixe que iba a fazer-la i fiç-la! Pronto, stá feita, fazida stá...

Ua puosta subre la Trindade

Diç que la fiesta fui mui buona! Fui ne l sítio de l'antigamiente, que agora ye mais coincido pul lhargo de la ourdenha. Ye l sítio de la fuonte que dá nome a la aldeia, claro.
L chano de tierra batida anchiu-se de antremoços i copos de cerbeija, criou-se l ambiente todo. Pessoalmente, a mi gusta-me mais assi l chano an tierra batida, porque amortece las danças, i até dá pra jogar a la belharda quando nun haba fiesta! Mas pouca giente dançaba, la giente debia ter medo de se cagar, i las rapazas cun aquels saltos de agulha spetaban-se ne l chano i nun se mexian. Ua tierra de tanta tradiçon i poucos beiladores...
Çcubriu-se na miesma festibidade un solário del melhor que hai, digno de un SPA de categoria, tan buono tan buono que só trabalhou ua manhana, porque afinal era fuorte de mais.

Adeia da Fonte???

Aldeia da Fonte? Que nome guapo para puner a un houtel. Pudeis cunfirmar an:
http://www.aldeiadafonte.com/en/

Anquanto naide scribe nada subre la fiesta de la Trindade, bamos a bançando cun nuobas sien antresse...