Diç que este die apareciu un nuobo Marroquino na associaçon... Al principio naide l stranhou, l rapaç staba al lhado d'outros dous homes cun cintos i tapetes als ombros, cada un a buer la sue cerbeija... inda perguntoran al rapaç quanto custaban ls chapeus i que so tenie tres ouros no bolso, que era para l Marroquino nun se sticar a pedir... Apuis, passadado un cachico, ya antandiran q'l rapaç nun staba alhi a bander nada...
La redaçon del Nuobas ben por estes meios desearbos a todos un Santo i Feliç Natal, apegados todos ls que gostais!!
Nun stábades a spera desta, nó? Nien sequiera bos alhembrábades deste retrato... You dixe que iba a fazer-la i fiç-la! Pronto, stá feita, fazida stá...
Diç que la fiesta fui mui buona! Fui ne l sítio de l'antigamiente, que agora ye mais coincido pul lhargo de la ourdenha. Ye l sítio de la fuonte que dá nome a la aldeia, claro. L chano de tierra batida anchiu-se de antremoços i copos de cerbeija, criou-se l ambiente todo. Pessoalmente, a mi gusta-me mais assi l chano an tierra batida, porque amortece las danças, i até dá pra jogar a la belharda quando nun haba fiesta! Mas pouca giente dançaba, la giente debia ter medo de se cagar, i las rapazas cun aquels saltos de agulha spetaban-se ne l chano i nun se mexian. Ua tierra de tanta tradiçon i poucos beiladores... Çcubriu-se na miesma festibidade un solário del melhor que hai, digno de un SPA de categoria, tan buono tan buono que só trabalhou ua manhana, porque afinal era fuorte de mais.
Diç que este die , uns rapazes furan a ber ls alemones i las alemonas, nun ye nenhuma qualidade de melones que se apanhan no prado. Eilhes alhá só smeian cebada, i ls rapazes furan alhá a colhé-la ya no sou stado liquido, quando sal de las torneiras fresquita i pronta a matar la sede. Ls gandulos bien l gustaban las ruças, mas durante l die la bica staba fechada, pur culpa d’uns bichos (“zombies”) que podien aparecer l fim de la nuite i antraban drento de las pessonas i las oubrigaba a ir lhougo a drumir, ou plo menos pa la cama, só nun podien star alhi n’l meio de la giente cun ls ulhos cerrados i cun las belas cumpletamente ancharcadas…Mas a la nuite eilhes çforraban-se, cuntoran al nuosso blog que la bica d’alhá era parecida cun aqueilha que stá al pie de la ordeinha, onde fui la Trindade, tenie quaije siempre las torneiras abiertas…
Na cunbersa cun ls alemones que recebiran ls rapazes, eilhes deziran que gustoran muito, que eran rapazes mui guapos, animados i querien tornar a cuntar cun eilhes pa l’anho. Este anho furan atingidos ls parâmtros mínimos de 25 barrils por die, mas pa l’anho ye preciso trabalhar mais porque ya chubiran ls mínimos. Un die ls alemones oubrigoran-los a ir al festibal de la cerbeija, ls rapazes nun querien ir, eilhes nun gustan i só fuoran porque ls alemones son mui grandes i agarrorun neilhes a la rastra, mas apuis cuntrariados alhá faziran la fiesta.
Outro die fuoran a la catedral de Ulm, ua tierra alhi acerca, ls rapazes guostoran muito, ya me deziran que biran alguns rapazes drento d’aqueilha capielha que na fiesta de la Trindade só ls bistes na capielha mais pequeinha d’l cabeço i agarrados a ua ruça fresquita.
Estes rapazes lhieban siempre la sue burrica para onde quiera que ban, reparai cumo nistante se chube cada un na sue…
Toda la giente gustou muito d’ls Portugueses, faziran muitos amigos i amigas pus claro, afinal eilhes eran só rapazes i eilhas alhi nun se deixan drumir… Inda hoube un die que ls Italianos nun ficoran mui cuntentos, tebiran la ablidade d'zafiar ls Portugueses para jogar la bola, ls Italianos dezien que eran ls campiones d’l mundo i andaban siempre a cantar na lhengua deilhes: ”Siamo campioni del mundo”, mas tamien son cumo l cuco de Fuonte Aldé, só canta no sou tiempo i la pormanhana, porque l fin, era Portugal que cantaba, ganhou a la Italia por 5-3, ah balientes. Toda la giente puode quedar çcansada que ls rapazes faziran sucesso, mesmo quando un d’eilhes ficou conhecido por l “Lord of Furtz”, mas todos guostoran muito, i se Dius quejir deiqui a uns dies ya tornan outra beç. L que antressa ye que passoran ua pândiga durante uns dies.
Qualquira aparência cun la realidade, nun bos finteis ye pura imaginaçon…
BIBA! Diç que se ban-se a ajuntar ls gueiteiros an Fuonte Aldé pur cousa del prujeto de “padronizaçon” de la gaita mirandesa. Desta beç son ls gueiteros nuobos i bielhos que ban a dezir algo. Mormente ls bielhos que inda tenen l sonido de las gaitas antigas na cabeça, i ye mui amportante que eilhes digan de sue justícia subre un sonido que cremos que seia aprubado cun base nun trabalho de muita anbestigaçon. Tenen sido studadas dúzias de gaitas i stranhamente, fui ancuntrado un padron de afinaçon antre alguas, betando abaixo un mito que dezíe que cada gaita nun era eigual a niua outra. Ye isto que bamos a tratar neste sábado díe 2 de Junho todo l díe an Fuonte Aldé an que ls prencipales seran ls gueiteiros. Pula nuite habrá un arraial mui fuorte cun gueiteiros purque ye yá la fiesta de la Santíssima Trindade. Galandum tamien bai a fazer un cuncerto cun Pauliteiros.
L retrato que bos apresento fiz-lo Paulo Meirinhos a Tiu Manel Paulo de Bal de Mira astanho cun fondo de outro feito al mesmo gueiteiro an 1940.
Diç que stá pra chegar la fiesta de la Santíssima Trindade, na nuossa tierra, claro stá. Bai a ser yá nel próssimo fin de semana, dies 1, 2 e 3 de Junho. Yá sabeis, nun podeis perder la fiesta que bai a ser rija! Cumo podeis ber, cuonta cun cartaç bien guapo, de la outoria d'un cunterráneo, e apuis ye carregar nél para lo berdes mais grande, i assi sabeis quei se bai a passar. "Ls mordomos astanho si trabalhórun bien!!", oubirun dezir a outro tiu cunterráneo. Apuis de la fiesta inda oubiremos mais cumantários, speremos que buonos, claro. Desta beç hai ua nuobidade: la fiesta bai-se a fazer adonde se fazie d'atrás, que ye ne l lhargo de la fuonte, adonde staba la ourdenha. Ourdenha esta que nun bai serbir para tirar l lheite a las bacas, mas si para mos anchir las mouges cun bino, cerbeija, antremoços, auga ou l que quejirdes, i an troca deixais alhá uas crouas de smola para la Santíssima Trindade. Ban alhá grupos de baile de la nuossa bezina bila, ls Funçon Públika i tamien bai haber nuite de gaitadas, adonde quien quejir i tenga la gaita acalcida i afinada que se junte al monte!
Nun ye diç que, ye miesmo berdade!... Parabéns ls rapazes i filhos de la nuossa tierra que ficoran n´ls dieç pormeiros lhugares a níbel nacional, i assi la scola de Miranda bai passar a tener tecnologia de punta l serbiço d'ls studantes i porsores. Agora ls porsores ya nun tenen tenen çculpa para nun daren buonas notas. Fica eiqui la blog i l bídeo cun que eilhes ganhoran...
Diç que an Fuonte Aldé aparecírun fai uns dies, un grupo de guapos i bien bestidos homes que l que puodo apurar l repórter "ti Marta", num eran ls cubradores de l´auga, mas si uns fiscals daqueilhes que hai muitos an Fuonte Aldé, a ber se l´auga era ou nó de buona qualidade. L nuosso repórter caçou-los cun la boca na bica i fiç la queston de tirar uns retratos para que todos beian que si fui berdade. Ls retratos mostran ls momentos de la chegada; quando anpeçan la pruoba; quando cumbersan sobre eilha, i la ultima, a arreganhar la tacha pal retrato. Ai que ber bien ne ls retratos, que dous de ls fiscals probadores iban bien armados, cun la "caçadeira" çpindurada als ombros. L´auga ye de mui buona qualidade i oubi dezir que la quieran ampeçar a bender i até yá tenan nome pra eilha: "SOUTORDIE" (pienso que todos antandiran la razon del nome). Nunca pensei ber una cousa destas an Fuonte Aldé, pensei que solo eran porbadores de bino i cerbeija!... La pruoba cumo podeis ber, fui patrocinada pela Super Bock... Porquei serie?!...
Diç fuonte bien segura que nun hai nada de nuobo an Fuonte Aldé. Stá todo mais o menos cumo neste retrato, que fui tirado há mais de un anho, pula altura de l Natal, na lhagona de baixo. Agora stá todo más berde, claro. Todo na misma... Zé cuntinua todas las manhanas a dar l sou passeio de bicicleta polas curtinhas, Vito e Antonho atrabessan ls dous balhes culas bacas mirandesas a la tarde, Patalão cuntinua cun bien proua de ls prémios que la sue mimosa ganhou, e Tartamão calça las mismas botas de quando habia bornais nas eiras. Todo eigual. Alguns de ls nuossos repórteres até yá apresentórun la sue carta de demisson, porque quieren outro sítio cun mais muobimento. Un bai-se pal Iraque e outro para Dues Eigreijas. Ah, nuobidade fresca! Diç que un rapaç i ua rapaza se ban a casar! Felcidades para eilhes!
