Nuobas

2011-11-29T21:51:00.002Z

Pus ua beç mais l Festibal de Cultura Mirandesa, Rezosa, stá para chegar, i cuntamos cun todos para fazer la fiesta!
Cumo ls outros anhos tenemos palestras i debates pula tarde para sobre acuntecimientos i einiciatibas de balor ne l Planalto, i por la nuite la grande Ceia Quemunitária, i apuis cuncertos culs cunterrâneos Galandum Galundaina i uns moços de Coimbra chamados Sabão Macaco, todos mui buonos!
Este anho ten ua nuobidade, la ACREFA e la Galandum Galundaina AC uniu-se a outra associaçon cunterrânea, Associaçon Sartigalhos Palgrinos, que fáien la melhor cerbeija artesanal de Pertual!
Assi teneremos tamien l purmeiro anho de l Sarti Winter Fest, para mos deleitarmos cun tan baloroso sumo de cebada.
Ne l Rezosa/Sarti Winter Fest, todos ls produtos son locales!

2011-06-21T20:55:00.017+01:00

La fiesta de la Tindade ye eigual a la taberna de bom bino, nun precisa de ramo a la puorta.
Astanho l tiempo ajudou i la giente quedou cuntenta, porque apuis de un anho a spera i tanta zpesa feita ye mui grateficante, de modo special para ls mardomos que tanto trabalhoran, que todo cuorrisse bien.

Parabienes para eilhes.

3 EN 1

2011-05-09T22:28:00.006+01:00

Uito de Maio, todos ls fuontealdeanos saben l que este die representa para eilhes.

La fiesta de ls sartigalhos, esses lafraus que un die anchiran de miedo ls nuossos antepassados, baliu-los la Eimaculada Cunceiçon, a quiem prometiran fazer ua fiesta todos ls anhos ne die a que a eilha corresponde se ls lhibrasse daquel terror.

La santa que no mundo ye conhecida por ser tan buona que anté serbiu para ser la mai de Dius i mai de toda la houmanidade, nun iba a abandonar ls sous filhos nua hora de tanta afliçon i cun toda la bondade que se le reconhece, lhibrou-los daquel termento.

L pobo nun la squeciu, nin se squeciu de la promessa i todos ls anhos la benera neste die cun missa cantada i precisson.

La ACREFA ten benido yá bai para quatro anhos,a fazer ua proba de binos a que l chama PIÇARRON, nós todos sabemos onde queda l Piçarron i como ye neste sítio onde hai mais i melhores binhas, alguien se lhembrou de l dar este nome a l'eibento.

Na mie oupenion, este fui l melhor anho de las probas, embora nun se puoda dezir l mesmo de ls binos. La grande maioria deilhes, i fuoran apresentados binte dous, staban doces i nun tardaran, segundo la oupenion de ls antandidos, a staren buonos para la selada, i fui l melhor anho de las probas, porque stube no juri, antre outros, un grande specialista na matéria. Angenheiro Juan Berdial, porsor de l IPB que sabe como naide de binos i probas de binos.

Ne l final, la ourganizaçon pediu-le para splicar l porquei de ls binos quedaran assi doces este anho i el dou ua aula outentica de como i quei se debe fazer para tenermos bino de qualidade.

Eilogiou la nuossa region i dixe que tenemos tierra, castas i clima para fazer bino de scelência, se nun l fazemos ye porque nun sabemos ou nun queremos.

Para acabar en beleza, la associaçon de Sartigalhos Palgrinos, quije apresentar la sue cerbeija, si la sue cerbeija que bai a ser produzida acá na tierra. Toda la giente la agabou i you que nun sou grande a preciador de cerbeija, -bá! si bebo uas bjecas, mas nin le tomo l gusto, - cunfesso que gustei bastante.

Stan de parabienes ls cerbejeiros.

Cun muita pena, nun tengo retratos de la precisson nin de la cerbeija Sarti.

PIÇARRON

2011-04-19T23:44:00.003+01:00

Nos últimos anhos, (esta ye yá la IV eidiçon), ten-se feito en Fuonte Aldé como todos sabeis, ua proba de binos, assi meio a la moda de concurso.

Este ye l berdadeiro sprito de la proba, desafiar ls nuossos conterrâneos a mostrarem las sues qualidades de einófilas i la pomada que son capazes de fazer, mas la ourganizaçon ten segundas antençones.

La berdadeira antençon de quien pensou, criou e desembolbe este eibento, ten caráctele pedagógico. I deixando de lhado la proua de ser l pormeiro classeficado, toda la giente l quier mas solo um l puode ganhar, la filosofie desta einiciatiba ye ajudar a melhorar la qualidade daquilho que boemos todo l'anho.

Espero cun çanceridade que isso seia antendido por quien querga partecipar.

Todos nós tenemos solo a ganhar i naide perde nada.

Eiqui queda l cartaç, quien podir i quejir benga a Fuonte Aldé que nun se arrependirá.

Jogos de Guerra

2011-04-17T23:29:00.007+01:00

Hoube jogos de guerra en Fuonte Aldé

Heis l campo de batalha en Bailhe Cunceilho.

Eigual que qualquier outro jogo i anté de guerra a la cierta, tamien eiqui hoube muito curjidoso que quije ber la guerra de acerca.

Um guerreiro bien porparado i mandon.

Alhá al fundo las canhonas de l Quito pacien descansadas sin se amportar cun la guerra.

Nun morriu naide i apesar de alguns arrascaren muito las nalgas, nun hoube feridos, solo alguns negrones nos braços i nas piernas que agora amostran como se fussen troféus.

ANTRUIDO AN FUONTE ALDÉ

2011-03-09T19:59:00.009Z

La tradiçon an Fuonte Aldé inda ye l que era, ou talbeç nó.

La nuite de Antruido nun fui para todos, ls rapazes que faien ls casamentos de l'antruido nun tebiran nuite. Un cibico antes de las uito, quando you iba pa l trabalho, parei na Associaçon stranhando que stebisse abierta àqueilha hora, entrei i temei un café, se l soubisse nun m'habie zaiunado, porque inda staba l repasto an riba de la mesa, ls casamenteiros, staben a restabelecer las fuorças porque habien acabado l trabalho.

L die nun se zapegou de l de trás i de maneira que era preciso reponer ls nibles porque drento de 2 scassas horas haberien de rumar a l Minho prefundo para fazer ua actuaçon de pauliteiros que nun tengo dúbidas fui fantástica i mui aploudida.

Mas pa ls ninos, que speran pu l'Antruido como ls bielhos por augas de Maio, nun quije la ACREFA deixar de cumprir tamien la tradiçon, inda pequeinha mas yá tradiçon, de ls proporcionar l sperado zfile de Carnabal, que tube la presencia de todos, ou quaije todos ls ninos de la aldé.

Debertiran-se muito, faziran debertir muitos mais i hoube mais ua fiesta na nuossa tierra.

Bou a poner eiqui uns retratos para berdes cumo stube animado l'Antruido.

L nº 6 fui l bicedor de l zfile:

L guarda de la PSP:

La Floribela

L guitarrista que scachou las cuordas de la guitarra:

Lindos!!!

I assi se fiç outro Antruido.

L camboio abariado an Fuonte Aldé!!!

2011-02-16T14:55:00.002Z

FADOS A PRETO I BRANCO

2010-12-16T21:39:00.007Z

Fados en Fuonte Aldé? Si, i fados de ls de cierto.

Que l diga quien ls biu i ls oubiu, quien podie nun biu, nun sabe l que perdiu.

Sábado 11 de Dezembro como yá atrás habie sido noticiado i todo por iniciatiba de ua rapaza que yá fui nuossa cunterrânea, Diana Caramelo, que mos quije presentear assi a modos de prenda de Natal, cun ua nuite que quedará para siempre na mimória de la giente de Fuonte Aldé.
Parabienes Diana i Tó, i bien haiades.

Ls bigotudos, agora yá nun se puode dezir de Fuonte Aldé porque yá benen de todo l lhado, anté de Spanha, beniran tamien alegrar inda mais la fiesta.

Hoube jantar, que staba mui gustoso, bino i cerbeija an barda, i gueiteiros apuis que ls fadistas se fuoran, yá passaba de la meia nuite,porque la fiesta durou anté la pormanhana.

De l concurso de ls bigotes que furan botados pu las digníssimas damas presentes, ficou assi ourdenado l pódio:

1º Zé Lu

2º Tó Xina

3º Manel Meirinhos

Todos ls bigotudos

Pa l'anho há-de haber mais.

I mais ua beç, la Cena de ls Bigotes, an Fuonte Aldé

2010-11-19T16:12:00.004Z

Cumo sei que andan uns por ende a perguntar eiqui e alhi a ber quando e adonde será la Cena de ls Bigotes, pus digo-bos-lo you eiqui:

La Grandiosa Cena de ls Bigotes bai a ser an Fuonte Aldé, ne l die 11 de Dezembre, i apuis de ua cena bien quemida e bien regada, bamos a tener un cuncerto de Fado! Nun podie deixar de ser, porque la tradiçon de l bigote i l fado siempre buírun de la mesma copa.
L grupo chama-se Fados a Preto e Branco, cuncerto oufrecido pula associaçon nuossa amiga Lérias, para que quede ua fiesta assi bien mais baliente.

Apuis de l cuncerto cuntinuamos la fiesta an grande animaçon, cun seron musical adonde toda la giente puode tocar l que quejir, gaita, caixa, bombo, guitarra pertuguesa, cabaquinho, charrascas, pratos, colheres, etc etc, sien que naide quede ambergonhado. Ye assi la melhor maneira de eisercitar essas manos que tantas ganas ténen de tocar!

Nun bos squéçades de spalhar la nuoba, para que bengan cada beç mais bigotudos, de Fuonte Aldé e de todo l lhado!

Ancuntramos-mos alhá anton, todos cun peluige por riba de las beiças!

CALEIJA de JUAN RAMOS

2010-11-06T17:53:00.002Z

Eiqui a tiempos postei ua nuoba sobre l IC5 i l camino de Trás de la Cruç, agora hai que fazer justiça, pus temoran medidas i zbioran l camino tal i qual l muita giente sugerie por la caleija de Juan Ramos.

L que queda bien nun parece mal a naide, de maneira que l problema stá resolbido i para bien, mas ua chubidica a l chegar a ls pinhos de Topa parece-me que se houbiesse quedado um cibico menos anclinada nun serie mais mal.

Quedemos sin l balhico mas tamien nun se puode querer todo.

L nuobo cura de Fuonte Aldé

2010-10-19T17:46:00.004+01:00

GALANDUM GALUNDAINA Fraile Cornudo from Tiago Soares on Vimeo.

2010-10-18T12:28:00.003+01:00

18/10/10

Galandum Galundaina gánhan 1.º prémio Megafone
Acabo de benir de l Centro Cultural de Belen (Pequeinho Ouditório) adonde acaba de le ser atrebuído l 1.º prémio Megafone - João Aguardela - Música para uma nova tradição als Galandum Galundaina.
Antes de mais, muitos parabienes als Galandum Galundaina, Alexandre Meirinhos, Manuel Meirinhos, Paulo Meirinhos i Paulo Preto. Fui buono star alhá i poder dá-le un abraço.
Pa la cultura mirandesa ye ua honra. Este prémio cerra un trabalho de culidade que ten benido a ser feito i que spero inda cuntine por muito tiempo.
Nun hai outro modo de la cultura mirandesa ser recoincida cumo un sério cuntributo pa la cultura pertuesa - si, ye esso que ten de ser -, seia na música, seia na lhéngua i na lhiteratura, seia na dança, seia an qualquiera outro ramo. Hai que seguir siempre por un camino de culidade, cada beç mais, i esso dá muito, muito trabalho, nun se faç cun dues cantigas i meia dúzia de cousas anriba la burra. Eisige persistença, sudor i pacéncia, nunca zistir de cuntinar i de fazer cada beç melhor.

puosto por AF an 10/18/2010 01:10:00 AM
Labels: AF, Galandum Galundaina, Música tradecional

Parbienes a ls Galandum i bien haja a l Porsor Amadeu Ferreira, a quien l pido çculpa por haber copiado esta nuoba de " Froles Mirandesas".

ONDE STÁ LA CAIXA DE L CORREIO?

2010-10-12T21:29:00.002+01:00

Onte, como tantos dies, apuis de chegar de l trabalho entretube-me a ourganizar la correspundência anquanto se fazien horas de cenar. Lhi, arquibei ou botei fuora cartas que me habien chegado ne l correio.
I como tantas bezes tube necessidade de responder a algua comenicaçon. Scribi meti no sobrescrito i fui a la caixa de l correio zpositar la carta.
L perro i l gato fuoran atrás de mi todos cuntentos, assi como de las outras bezes i son çtemunhas de las falas malas que saliran de la mie boca, antre palabras menos dignas xclamei: rouboran la caixa de l correio!
Antrei en casa de mie suogra, que era la casa onde staba zpindurada la dita caixa i perguntei-le por eilha, a l que eilha me respondiu que l carteiro la tenie retirado por ordenes superiores i que nun mais regressarie, assi como tamien nas outras aldés.
Sali dalhi scarbalhando contra ls correios i contra quien manda neilhes, dá eideia de que somos como l burro de San Brás, an bés de andar para lantre andamos al para trás.
Nun se m'antende a mi, i cuido que tamien a naide;
Que raio de prejuízo las caixas l darien a ls correios, nun pagan décima, nun pagan aluguer de l spácio que acupan nun piden pan, nun se meten cun naide i sirben las comnidades lhocales, porque raio las retiroran?
Como há-de andar para lantre un paíç, onde quien manda nun sabe l que fai?
You ponie eiqui un retrato de la caixa para lhembrância, mas onde l tengo?
Fago eiqui un apelo a toda la giente de las aldés onde retiroran las caixas, i sei que hai muita giente que ten las sues eiquenomies nos CTT en certeficados de aforro:
Se nun serbimos para ua cousa, tamien nun serbimos para outra, bamos alhá, alhebantamos l que ye nuosso e zpositamos-lo onde mos deia la gana, porque hoije anté hai quien pague mais i melhor do que essa anstituiçon, ye solo queston de percurar.

La cena de ls Bigotes

2010-10-06T12:08:00.016+01:00

Buno, parece que l campeonato de la europa de bigotes yá fui l fin de semana passado!

http://clix.expresso.pt/o-meu-bigode-e-mais-farfalhudo-do-que-o-teu=f607307

Se calha, ampeça a quedar na altura de deixar medrar l bigode...

Pus... se ya ten alcatron...

2010-10-06T11:56:00.005+01:00

Diç que la IC5 ya ten alcatron... Pus anton, stá na hora de la spurmantar...

Mas ye preciso tener cuidado cun l poço que falou Félç :) porque parece que la strada inda nun ten las barreiras laterales pra ampedir als spistes pur la ribanceira abaixo...

IC5

2010-09-26T22:39:00.005+01:00

Yá bai armada la strada IC5, de l Cruzeiro anté Dues Eigreijas yá ten alcatron quaijque en todo l campo, las puonte stan quaije acabadas de maneira que la obra stá mui adelantrada yá.

La anchura de la bia mais parece ua strada de l sieclo XIX que de l XXI, pus nun bai a quedar mais lharga que la Nacional 221, la bantaige será que nun passa drentro de ls lhugares i ten menos curbias, mas ls angenheiros alhá sáben, ou se calha nun sáben nada.

Bonda mirar para uns retratos que bou a poner eiqui i yá se bei l'antandimento que ténen.

Mas bou a dezirbos por quei scribo esta nuoba.

Para se poder atrabessar esta nuoba bia, faziran no camino de l Nabalho que bai para Palaçuolo ua puonte mai baliente, ora para dar passaige pa las propiedades que quedal de l'outro lhado de la strada, ban a abrir un camino paralelo a esta i muito bien, mas naqueilha cortina de l Cruzeiro, que era de tie Catrina, l nuobo duonho recunstruiu l poço, mas quije la mala suorte que houbiesse quedado mesmo juntico a l aterro.

Nun s'antendendo este cun ls spropiadores a respeito de la andemizaçon, porque un poço custa mui caro i nun l quieran pagar pul que el bal, decidiran zbiar l camino pul lhado de baixo quedando l chafurgo antre las dues bias.

El hai cada ua!!!
Mirandesmente falando, queda aquilho um grande bostraco.

Fiesta de Santa Bárbela

2010-08-18T13:42:00.002+01:00

MALEITAS

2010-08-01T19:40:00.006+01:00

Hai alguns anhos atrás l lhugar de Fuonte Aldé, assi como todos porqui alredor, staban arrodeados de uolmos, árbols centenairas que mataban fome a muito cochinico i daban muita selombra, onde se cuntaban muita mintira, muitas mais ficoran por cuntar i tamien se namoraba.

Ua maleita que la maioria de la giente nun sabe justeficar, you sou un deilhes, secou todo este património florístico que tanto ambelhezaba las aldés de l Praino.

Las ciguonhas aprobeitaban estes gigantes que arrodeaban ls lhugares, para ende fazeren ls nius que l serbien anhos áfios en perfeita camaradage cun storninos e pardals que fazien ls sous nius ne l mesmo prédio i muitas bezes anté l'antriçaban no própio niu de la ciguonha.

La tal maleita secou estas çantinelas seculares, a partir de ls anhos 80 de l séclo passado, para grande zgusto i perjuízo de ls lhabradores que assi perdiran algun sustento de las crias i selombras frescas ne l berano.

Eiqui há meia dúzia de anhos parecie que estas árbols habien bencido la maleita i ganhaban de nuobo lç spácio que ls pertencie por dreito própio. Yá habie alguas cun tamanho razonable i la giente yá aprobeitaba para ripar la fuolha, "Ripa a folha ao teu olmo/que eu ao meu já lha ripei/ tira de mim o sentido/ que eu de ti já o tirei", (Cantigas!!!), i assi tornar a ls tiempos datrás.

Mas para grande zgusto miu i de toda la giente, por onde quier que passemos, só bemos uolmeiras secas.

Diç que l cimento stá caro!

2010-07-25T11:12:00.006+01:00

Diç que l Cimento stá caro mas eiqui estragou an barda.

Na sexta die 23 a la tarde chegou an pie de la oufecina de Zé Demingos um camenhon cisterna cargado de cimento an puolo, cun la bábula de zcarga abariada.

Anquanto l chofer fui a la oufecina a saber de ferramienta pa la zbloquear, se calhar inda ben para el pus s'adrega a star a la borda naide sabe l que l puodie haber acutecido, arrebantou la dita bábula i saliu subre presson arrumado a 4 toneladas de cimento de l qual grande quantidade entrou pu la jinela de l scritório de Amélia fazendo grande estrago.
Las outridades (GNR) temoran cuonta da la oucorrênça, eizoloran l lhocal cun fitas, a spera que soutordie la Proteçon Cebil se ancarga-se de fazer la lhimpeza, l bieno a acontecir de facto no sábado por eiquipas specializadas de la ampreza que s'acupa de la recuolha de i lhimpeza de l lixo no cunceilho, acumpanhadas por ua eiqipa de l INEM.

Naide se feriu i todo acabou an bien.

PIÇARRON 2010

2010-06-28T22:36:00.005+01:00

Piçarron 2010.

Esta fui la III eidiçon de la única porba de binos que se fai no Praino (julgo you). Parece-me que antandi, que hai yá quien querga seguir l eisemplo noutros lhugares, mas la nuossa ye pioneira nestas bandas.

Fuoran apresentados astanho a la Porba, 16 binos zfrentes i salbo un que diç que estaba yá un cachico a dar para l tempero de seladas, ls outros segundo la oupenion de l juri eran bastante buonos i l Porsor Almendra que ye l porbador oufecial deste eibento, (l único que stubo nas trés eidiçones), la qualidade de la pinga ten benido a oumentar. Solo por esta rezon yá se stá a ganhar, mas queremos que melhore inda mais. Parabienes a ls lhabradores.

Ls porbadores fuoran: l porsor Amendra, Vitor Ferreira, la nuossa cunterrânea Eirene, (por bias de la lei de la paridade tebimos que poner ua tie, i saliu-se mui bien), Abel Nebes de la confraria de de Trás ls Montes i Alto Douro i, Patchi, um espanhol de Fornilhos de Fermoselle, que para alhá de ser produtor de queijo de cabra, de l que melhor se acha en toda la Península Eibérica, ye tamien produtor de binos de grande qualidade, mas que ls sporta quaije na totalidade para bários paises de l mundo; Alemanha, Japon, Canadá, etc. Segundo me dixe el, la produçon nun ye mui grande, mas aposta na qualidade, creio que a la buolta de 12.000 garrafas. Bende toda la produçon. Passo la publicidade i quien quejir poude bejitar la página que el ten na anternet, http://www.lasetera.com/ .

Hoube binos de lhugares de fuora, Prado Gaton, Picuote i Penas Roias.

L pormeiro prémio astanho ganhou-lo Hermínio Rodrigues i l mais curjidoso ye que el siempre bende las ubas a Namora, cumo será que fiç aqueilha pinga!!! l segundo fui para Ramiro Luis i l terceiro para Artur Martins. Debo referir que la zfrencia en termos de pontuaçon era mínima antre ls pormeiros.

La ourganizaçon ztribuiu prendas a ls porbadores i l respectibo certeficado, assi como a a ls trés pormeiros classeficados, ls restrantes tebiramn un diploma de partecipaçon.

Para finalizar serbiu-se ua merenda regada cun las pingas apresentadas ou semol pa ls ninos.

Fuonte Aldé nun pára.

2010-06-21T23:20:00.003+01:00

Fuonte Aldé nun pára, esta ye ua semana en grande

Sesta: ls nuobos mardomos de la SS. Trindade, ban a fazer la fiesta de l San Juan. Sardinas, febras i bino an barda, no lhargo de la bica.

Sábado: Luis, la mesma cousa ou se quejirmos; bino febras i sardinas an barda tamien no lhargo de la Associaçon.

Demingo: "PIÇARRON". Si, esse eibento que yá bai na terceira eidiçon i que ten dado que falar. Ls melhores binos de la region son apresentados i classeficados eiqui na nuossa tierra. Las porbas feitas por especialistas seran a las 3 de la tarde no salon de la Junta de Freguesie, onde no final será serbido um pequeinho lanche para que todos puodamos porbar las especialidades bínicas alhi apresentadas.

TRINDADE 2010

2010-05-24T19:32:00.004+01:00

Yá cheira a Trindade.

Stamos na recta final, i no fim de semana que ben, todos ls funtealdeanos quieran star presentes para la animar.

Speramos que l tiempo mos ajude, porque la nuossa fiesta merece.

Esta nun ye ua fiesta qualquiera, ye ua ROMARIA que se perde na mimória de ls tiempos por las mais bariadas rezones:

Nun se benera un santo qualquiera, nós fazemos la fiesta en honra i loubor de Dius en toda la Sue plenitude, la Santíssima Trindade, PAI, FILHO i SPRITO SANTO.

Ye ua fiesta singular, onde las mocidades de las aldés bezinas se ajuntam i cada ua a la beç dan rondas a l redor de la capielha, , cantando, boziando i dando bibas en franca alegrie.

Ls tiempos de la porrada, por la qual era tristemente conhecida yá passou, por isso nun tengades miedo, benie acá que sereis bien recebidos i tenereis ouportunidade de assistir a ua fiesta que se çtinge de todas.

Para acabar bou a poner eiqui um soneto que fiç l'anho passado por oucasion de l'ancontro de bloguers de l Praino que se rializou justamente no cabeço de la Trindade.

CABEÇO DE LA TRINDADE

Alto cabeço de berde forrado,
Guarda de l Praino, fiél çantinela,
Bés-lo anteirico dua miradela
I anté la Spanha que tenes al lhado.

Medra an tou lhombo tan rico muntado.
Mora na tue crona an casa singela,
Feita de piedra sin ua jinela,
Dius Pai, Santo Sprito i l Filho houmanado.

Fuste terreiro de guerras i amores
Quantos segredos nun guardas p´ra ti,
Suspiros, gemidos, bózios, delores...

Xaras, sobreiros, selombras i flores
Nácen, crécen i florécen eiqui
I cántan alegres ls reisenhores.

L Cartaç de la Fiesta de la SS.Trindade 2010

2010-05-12T15:23:00.000+01:00

8 de Maio Fiesta de ls Sartigalhos

2010-05-09T20:59:00.004+01:00

8 de Maio, la mais tradicional i nun menos amportante fiesta de la nuossa tierra. La fiesta de ls sartigalhos.

Nós fuontealdeanos sabemos i antandemos la carga mística que esta tradiçon ancerra, mas para quien nun sabe solo digo que este die ye sagrado an Fuonte Aldé, que cumprimos na medida de l possible ua bielha promessa de ls nuossos antepassados i que la tradiçon stá biba, de salude i que se requemenda.

Astanho apesar de calhar an sábado i muita giente tener ouportunidade de partecipar na missa, la eigreija staba chena, l tiempo nun mos deixou fazer la precisson a l redor de l lhugar cun la Eimaculada Cunceiçon por bias de star a chober, inda assi, ls mardomos pegoran no andor eigreija abaixo i l cura fiç las eiséquias de abençoar ls campos mesmo a la puorta de l campanairo.

Finda la missa i porque chubie nun se puode fazer la fiesta no sagrado, de maneira que toda la giente se zlocou pa l salon de la junta onde se quemiu i bui l que ls mardomos oufereciran a toda la cumnidade. Bino, roscos i antramoços i todos quedemos bien cuntentos.

Grande fiesta! Onde dan a quemer i a buer que mais podemos pedir?

Biba Fuonte Aldé.

Diç que nun ten habido nuobas!!!

2010-04-26T16:00:00.003+01:00

La nuoba que bos bengo eiqui a dezir ye que zde l Rezosa nun ten habido acuntecimientos amportantes dignos de aparecer eiqui nel nuosso Blog.
Mas nun quedeis anfelizes, deiqui a un més bai a ser la fiesta de la SS Trindade i de cierto que bai haber nuobas cun fartura(ó nó)!!!

REZOSA

2010-03-23T12:22:00.004Z

Diç que an Fuonte Aldé nun se fai nada.

Quien biu i partecipou no REZOSA deste anho, zminte essa afirmaçon.

Zde la fiesta de "l burro i l gueiteiro", (que fui sin dúbida l que de mais grandioso algua beç acá se fiç, parabienes as ls ourganizadores), este Rezosa bieno tamien mostrar a toda la giente que la mocidade de Fuonte Aldé stá atiba, quier i ye capaç de fazer cousas grandes.

Las cunfréncias que na postage anterior se anuncioran, corriran mui bien i furan bastante partecipadas, bieno muita giente de fuora.

L cochino que Eisidro assou no speto staba ben temprado i puxou por bino i cerbeija. La giente gostou.

Gostou tamien de l cuncerto que Paulo Meirinhos i ls sous alunos de las scuolas de Miranda mos apresentou. I que bien cantan ls garoticos!!!

Ls Galandun dóran un cuncerto memorable, ls pauliteiros d'acá, que toda la giente sabe que son ls melhores de ls melhorestamien mostroran las sues hablidades i por quei l son.

Todos de bigote! Onde yá se biu um grupo assi? Pauliteiros bigotudos? Claro solo an Fuonte Aldé.

Mas toda la rapaziada andaba de bigote. Anté you que yá stou a quedar belhote, tamien deixei bigote.

Sin querer fiç un berso, eheheheh.

I aqueilhes amigos sturianos que tanto animoran l'anho passado? Tornoran astanho. Sinal que gostoran.

Pa l'anho há-de haber mais.

Rezosa 2010

2010-03-04T12:32:00.009Z

Tenemos l prazer de anunciar mais un anho de fiesta de cultura Mirandesa, i stais todos cumbidados!

Este ye un festibal que ampeçou an 1998, i yá lhieba ua dúzia de anhos, siempre cul motibo de promober l que de buono ten la nuossa tierra (i las Tierras de Miranda an geral). Siempre fui un lhugar de çcusson, muito debido a las cunferéncias que se fáien, cada anho cun sou tema çfrente. Yá se çcutiu l que de buono se staba a fazer, mas tamien ls cousas malas que hai que dezir i cumantar.

Este anho la cunfréncia ten por tema "La Agricultura Sustentable an Tierras de Miranda" - un tema pertinente para todas las tierras de l planalto. Ban a mostrar un pouco de la sue speriéncia i de l que saben, cada un na sue área:

- Carlos Ferreira - Desertificaçon: Causa/Eifeito - Potencialidades que tenemos de nible sócio-cultural que mos ajuden a trabar este fenómino.

- Miguel Nóvoa - Potencialidades que l Burro Mirandés puode tener nel zambuolbimento sócio, económico, turístico e cultural na region.

- João Paulo Castro - La amportáncia de l'amparcelamiento para zambuolbimento rural.

Claro stá que toda la giente poderá cumentar, perguntar, dezir l que le pareça...

Apuis a la nuite tenemos ua buona cena, quemunitária, para toda la giente que quejir benir, i -nuobidade astanho - l ancontro anual de bigotudos, que la mocidade de Fuonte Aldé fai todos ls anhos!

Nun sei se bos recuorda, mas la purmeira ajuntança nacional de gueiteiros an tierras de Miranda fui ne l Purmeiro Rezosa, claro, an Fuonte Aldé.

Apuis de tener las barrichas bien chenas de chicha e bino, ye tempo de ber ls Galandum Galundaina (tamien filhos de la tierra) an cuncierto, cun partecipaçones de ls Pauliteiros de Fuonte Aldé, i tamien outros cumbidados que aparecen ne l sou nuobo disco. Esta será la apresentaçon oufecial an Tierras de Miranda de todo l disco "Senhor Galandum".

Cumo bien sei que la giente queda cun buntade de mais música i bino, la fiesta cuntinua, an jeito de terreiro tradicional, adonde hai lhugar para todos ls que queiran tocar, beilar, cantar, cuntar anedotas, i todo i todo....

Cuntamos cun bós para mos ajudardes a fazer la fiesta, i a quemer la chicha!

Diç que Fuonte Aldé yê tierra de Artistas

2010-02-23T11:58:00.003Z

Estas cousas yá nun son d'agora, mas para quien inda anda çtraido, Fuonte Aldé anda nas bocas d'l mundo. Diç que fui de las tierras mais represantadas culturalmente n'l Festival de Sabores Mirandeses.

Cumo diç al Resosa "Funte Aldé yê un marco na cultura Mirandesa".
You dirie mais: "Fuonte Aldé yê un fincão na cultura Mirandesa".

La cena de ls Bigotes de 2009

2010-02-17T18:20:00.003Z

Diç que dezírun que la cena de ls bigotes de 2009 inda nun se fizo, por esso bengo eiqui al palanque birtual de Fuote Aldé a perponer ua data - la misma data de l Rezosa, que ye 20 de março! Só que, cumo bedes, an 2010...

La cena assi nun seria solo de bigotudos, mas ye ua buona maneira de passarmos l Rezosa culs amigos, e tamien cun amigas (que desta maneira nun precisan de tener bigote para staren cun nós!) de maneira çfrente. Nunca bistes un grupo de pauliteiros a beilar, todos eilhes cun bigodes de home, ora nó? Nien bistes un moderador tan guapo cumo l que bai a star nas cunferências ne l meio de ls ouradores, assi cun bigote de giente amportante!

Anton que dezis? Fazemos-la ó cumbinamos outro die? You yá tengo l miu feito!

Diç que ai nubidades nel Cabeço

2010-01-24T19:06:00.010Z

Nel próssimo die 30 de Maio(die de la fiesta de la SS Trindade), l nuosso cura ya bai a puder celebrar la missa an riba de un palanque que stá a ser custruído a la selombra de un sobreiro. L maior porblema ye que debido a las dimensones del dito pulpito, l grandioso i afinadíssimo coro dels eilegantes rapazes de Fuonte Aldé, nun bai a puder lhibertar las sues ancantadoras bozes lhougo alhi pur trás dels celebrantes.

Quei se puderá fazer anton?
R: De las dues trés, ó canta un de cada beç las modas durante la missa ó ban pal chano que tamien stan bien, ó monta-se l palco de la Cámara cumo ls outros anhos.

Solo ua eideia pa quedar guapo l pulpito. Nun bos squeçades de poner nel suolo uas piedras brancas de mármole i que l altar seia de cantarie bien bien lisica, quaisque bidro, pra quedar anquadrado cul stilo atual e moderno de la Capielha de la SS Trindade.

Instrumentos Made in Fuonte Aldé

2010-01-07T12:18:00.002Z

Senhor Galandum

2009-12-14T14:36:00.001Z

Aí stá l disco Senhor Galandum a passar na Antena 1 http://http://tv1.rtp.pt/antena1/?t=Disco-A1-Galandum-Galundaina.rtp&article=1479&visual=10&tm=2&headline=14

Brebemente, apresentaçon an Fuonte Aldé.

Eilhes stan a chegar

2009-12-09T10:34:00.001Z

De díe 12 a 19 na Antena 1...

Tradiçones

2009-12-06T13:49:00.007Z

Diç que l més de Dezembre ye un més de grandes tradiçones.

Ye berdade sin senhor. Fiestas, romarias pu las degas, Rezosa, fogueira de l Natal i you sei que mais... Debertimentos quanto basta.

Ua de las mais anraízadas tradiçones ye sin marge para dúbidas l encontro de ls bigotudos que cumpriu yá dues eidiçones cun grande pompa i circunstáncia.

Astanho por bias de apertos de calendário de muitos partecipantes, yá que toda la giente anda mui acupada cun ls sous afazeres i la nuossa tareia an purmeiro lhugar, bamos a tener que deixar passar l'anho Nuobo para fazer dous destes eibentos que tanto angrandecen la mocidade de Fuonte Aldé:

La Rezosa,

La fiesta de ls bigotudos.

Tanto para ua cumo para outra aceitan-se prepostas e sugestones, que puodan i deben ser referidas eiqui.

Pese l facto de nun haber inda die defenido para estes eibentos, cumbenie que se rializassen antre l'anho Nuobo e l'Antruido, anté porque ye ua altura que carece an dar que falar.

Agricultura de secretária

2009-11-18T21:08:00.004Z

Diç que la agricultura bai mal, yá naide sabe podar, naide sembra las cortinhas, naide ten bacas cumo d'antigamente...

Pus agora hai un anchiente de nuobos agricultores, uns inda rapazotes, outros yá homes criados. Alguns deilhes nunca tubiran burras nas manos sequiera ua beç. Stou a falar, claro, de l Farmville:

Ye berdade, hai giente que pouco drume para tener la sue quinta siempre cuidada i bien lhabrada. I perguntais bós "Mas l que se planta? Se nun fai burras nas manos ye porque se anda siempre de trator, nó?" ou anton "Conho! Este ten muitas tierras! Debe ser rico.. bou-me a casar cun él"

Pronto, ua cousa de cada beç: podeis plantar todo l que quejirdes, teneis tomatos, cebolhas, manzaneiras, ouliberas, etc etc, e anté cousas de mulheres cumo tulipas, rosas. La rezon que esta lhaboura nun fai burras nas manos ye que para esta quinta solo se usam dous dedos, ls de l rato. Tamien hai tratores para lhabrar, para sembrar i para apanhar.

Cumo ye ne l computador, puode-se plantar a qualquiera hora.

Diç que uns rapazes l'outro die tubiran que sperar hora i meia para iren pal Intalaia porque un agricultor mui dedicado staba a recolher las sues berças..

Este jogo ye melhor que la realidade porque:

-Nun hai problemas culs limites de ls terrenos

-Nun hai caminos a passar por riba de terrenos de outros

-Toda la giente ye amiga, i naide pode roubar las balancias de ls outros!

Mas na berdade nun se ganha nada cun isto.. Solo se ganhan horas perdidas

Balientes Mulhieres de Fuonte Aldé

2009-11-08T08:27:00.008Z

Quando eiqui atrasado, inda antes de la campanha pa las eileiçones, las mulhieres socialistas mirandesas se ajuntoran an cumbíbio nun restourante an Miranda, las de Fuonte Aldé, mulhieres balientes, combinoran que se l partido deilhas ganhasse, habien de fazer outro an Fuonte Aldé, mas solo pa las dacá.

Cumo tal acunteciu, cumpriran l que prometiran i faziran ua festa mui baliente.

Assi sendo i para alhá de las própias famílias, stebiran presentes: l Dr. Artur Nunes, presidente de la Câmara, l Dr. Ilídio vice presidente i la sue tie, la bereadora Dra Anabela, la presidente de la Assembleia Municipal Dra Jacinta i l sou home, l presidente de la Junta tiu Adérito i la sue tie, tiu Abílio que ye l secretário, l tesoureiro tiu Paulo de Freixenosa, l presidente de la Assembleia de freguesie Dr. Francisco Venâncio i la sue tie.

Naide falou en políticas, stube todo mui bien, hoube muita animaçon, muita bariadade de quemida, buida i doçarie que las ties de la nuossa tierra s'ancargoran de porparar.

Parabienes, balientes mulhieres.

Ora (dezireis) oubir streilhas!

2009-10-31T14:32:00.006Z

“Ora (dezireis) oubir streilas! Cierto
Perdiste l juízo!” i you bos dezirei, entretanto,
Que, para las oubir, muita beç you sperto
I abro las jinelas, branco de spanto…

I cumbersamos to la nuite quando
La strada de Santiago, cumo un pálio abierto
Brilha. I, al nacer l sol, saludoso i chorando,
Inda las squadrinho pul cielo desierto.

Dezireis agora: “Ah boubico amigo!
Quei cumbersas cun eilhas? Que sentido
Ten l que dizen quando stan cuntigo?”

I you bos dezirei: “Amai se las quereis cumprender
Pus solo quien ama puode tener oubido
Capaz de oubir i de las antender."

»»»»»»»»»»»»»»»»»»»»»»»»»»»»»»»»»»»»»»

"Ora (direis) ouvir estrelas! Certo
Perdeste o senso!" E eu vos direi, no entanto,
Que, para ouvi-las, muita vez desperto
E abro as janelas, pálido de espanto ...

E conversamos toda a noite, enquanto
A via láctea, como um pálio aberto,
Cintila. E, ao vir do sol, saudoso e em pranto,
Inda as procuro pelo céu deserto.

Direis agora: "Tresloucado amigo!
Que conversas com elas? Que sentido
Tem o que dizem, quando estão contigo?"

E eu vos direi: "Amai para entendê-las!
Pois só quem ama pode ter ouvido
Capaz de ouvir e de entender estrelas."

Olavo Bilac

Las Rues de Fuonte Aldé

2009-10-31T13:38:00.005Z

La última nubidade de Fuonte Aldé, i grande nubidade por acaso, ye que nesta semana todas las rues sofrírun melhoramientos.

Cumo podeis ber ne ls retratos, quedórun marabelhosas, punírun tapete de alcatron quaijque an todas i agora yá nun se tropeça naqueilhes remendos mal amanhados que stában assi zde que andebírun cun ls saniamentos.

No sagrado nun mexírun, mas parece-me que oubi falar que ban a fazer um arranjo ourbanístico, a poner puiales i nun sei que mais.

Estas obras eran sin dúbida ua falta que tardaba en ser reparada.

Parabienes a la Cámara Municipal, se calhar se las ten feito mais a tiempo, habien tenido outro resultado nas eileiçones.

Nuobas

2009-10-20T18:52:00.003+01:00

Faziran-se las bandimas, colhiram-se las ubas cun tiempo scelente, la pinga yá parou de ferber, hai anté qiuen yá beba de l nuobo, fiç-se la semanteira tamien cun tiempo buono i birou-se ua página na política de la tierra.

Ampeçou a chober se calhar un cachico antes de tiempo, inda queda por botar l'eirbicida, mas tamien nun podemos querer todo a la nuossa maneira.

La lhagona de las Silbeiras staba seca i yá ten auga, la de la Lhameira deixaba a zcubierto la fraga nadadeira i agora yá toda la giente sabe que nun ye nadadeira mas que stá assente an riba doutra, tamien esta yá se anchiu.

L'inbierno ben ende, yá dous dies que fai un friu a que nun stabamos aquestumbrados, mas tamien isso fai falta para cortar melhor la benhorra i nun mos podemos squecer de las chouriças! Hai que ampeçar a pensar no cochinico, San Martino stá mesmo a la puorta.

Fuonte Aldé bai a botos

2009-09-25T10:24:00.003+01:00

Ye Fuonte Aldé i todo l resto de l País.
Mas, na parte que toca a Fuonte Aldé, ya se sabe l que pul menos 65% de las personas ban a botar. Él hai uns que siempre botan PS, i ls que siempre botan PSD. Bós sabeis quien son, nun bale la pena poner-los eiqui. Afinal, l boto ye secreto, nó? Toda la gente sabe, mas ye secreto..
Cumo dezia l'outro: "you boto siempre X, nien que steia alhá un burro, boto siempre X!" (trocar l X pul partido que bos der mais raiba).
Agora la berdadeira queston queda-se an saber l que ls outros 35% ban a botar. Uns porque son nobos i inda sperimentan fazer cruzicas adonde ls pais nun quieren, outros achan que neste momento l país staba melhor assi, outros assado, outros strugido, outros cozido...
La Secçon de Statísticas de la Comisson Oufecial de Cuscobelhices de Fuonte Aldé yá mobelizou todas las ties i paredes cun oubidos para bos daren ua sondaige cun ua precison de 0.5%. Ye ua ciencia cumplicada.

Agora l que ye cierto ye que Fuonte Aldé solo, nun ten botos sufecientes, nien sequiera para eileger ua mano de un deputado. Por isso, por esta beç, las atençones de l país stan biradas para la outra capital - Lisboua

TeleCurral II - Cumboio Turistico

2009-09-23T18:06:00.004+01:00

For fin....

Mais ua beç i porque estas cousas dan muito guosto a fazer, mas tamien dan muito trabalho, nunca yê demais agradecer, Flisbino Bino i Justino Tino, agradeçan a todos ls que ajudoran nesta fiesta.

TeleCurral II - Biolento acidente an Fuonte Aldé

2009-09-16T15:29:00.001+01:00

TeleCurral II - Publicidade

2009-09-09T23:39:00.003+01:00

Oubrigado a todos ls patrocinadores por nos teneran ajudado i por apoiaran estas cousas.

TeleCurral II - Campaninas Alive

2009-09-08T18:44:00.001+01:00

TeleCurral II - Tragédia an Fuonte Aldé

2009-09-04T13:44:00.003+01:00

Yê preciso tener cuidado cun çconhecidos :)

TeleCurral II - Fuonte Aldé ya parece Lisboa

2009-09-02T20:21:00.003+01:00

Cousas d'ls tiempos modernos

TeleCurral II - Apresentaçon

2009-09-02T15:55:00.003+01:00

Durante ls proximos dies bamos publicando ls bídeos de furan usados n'l spetáclo "TeleCurral II" d'l die 28 de Agosto an Fuonte Aldé. Equi queda l purmeiro...

FlisbinoBino i JustinoTino pediran mais ua veç para agradecer a toda la giente que participou i ajudou neste spetáculo que bien trabalho les dou.

TeleCurral II

2009-08-20T16:50:00.002+01:00

Diç que, an Fuonte Aldé die 28 de Agosto de l decorrente anho, se bai a realizar la sigunda eidiçon del TeleCurral. Bai a ser ua nuite de scachar la cabeça de tanto rir. Ua comédia screbida e represantada por Justino Tino e Flisbino Bino. Ye ua actibidade que sta ancerida nas actibidades de la Fiesta de Santa Bárbela. Pus agora ya sabeis, die 28 aparecei por Fuonte Aldé que bai a ser ua fiesta de arromba.

L burro, l Gueiteiro i La puonte del camboio

2009-08-14T14:45:00.010+01:00

Diç que la puonte del camboio nunca tenia bido passar tanta giente pur ambaixo an tan pouco tiempo.

I ls lhameiricos del tanque de lhabar...

Que fino ye l perro!!!

Xutos & Pontapés na Trindade 2010

2009-08-04T15:51:00.005+01:00

Ye berdade! Bai a ser pal anho que ls grandes rockeiros pertueses bénen acá a la nuossa querida tierra!

Graças a la anterminábel sede de ls burriqueiros, que pur acá animórun la fiesta de ls burros, i a la inflaçon speculatiba (ls economistas alhá antenden disto) astanho la comisson de fiestas de la Santíssima Trindade bai a tener denheiro para ls chamar.

Pus a mi parece-me mui bien, yá que se cobran preços de cidade grande pur ua mini, ye traer un grupo grande para la fiesta.

You yá dei la mie smola!

L BURRO I L GUEITEIRO

2009-08-01T20:53:00.013+01:00

Fuonte Aldé foi grande an saber recebir.

L encerramento de l festibal itinerante "L BURRO I L GUEITEIRO" fui justamente nesta nuossa adorada terrica.

L lhugar estaba anfeitado cumo nunca se habie bido. A l redor de la eigreija, uas barraquitas brancas, uas cuordas cun bandeiricas de todas las quelores i lhuzes tamien todas queloridas

Eran siete i meia de la tarde no die 29 i yá habie grande animaçon no largo de la fiesta de la Trindade, la giente iba chubindo pu l camino de las lhagonas i you fui tamien a ber.

Ua precisson maior que la de l Senhor de l Passos de Dues Eigreijas benie pu l camino abaixo, a la frente um grupo de gueiteiros tocando un passacalhes, lhougo atrás un grupo de bombos chamado Tocándar i que son de la Marinha Grande, batendo certicos cumo ua orquestra, atrás no meio de ua multidon einorme, uas atrás de las outras e cargadas de giente, pori ua dúzia de carroças, todas las de l lhugar, poucas faltarien, furan a receber ls caminantes an pie de la puonte, que benien an passeio zde Atanor.

Chegados a l lhugar doran ua buolta tocando por las rues i paroran no Sagrado que fui pequeinho para tanta giente.

Durante dous dies fui grande la animaçon an Fuonte Aldé, la pormeira Feira de Anstrumentos Musicales Eiberica (FIMI) fui acá nas tals barraquitas brancas que aculhiran esses artistas fabricantes artesanos.

Na pormeira nuite, un cuncerto memorable cun dous grupos de renome: UXUKALHOS (pertués) i ELISEO PARRA (spanhol).

Soutordie, la Feira para quien quije ber, mercar ou aprender a fazer strumentos; ua cumbersa no curral de tie Clementina, cun nome grande de l panorama musical eiberico, LUIS DELGADO, spanhol cun muitos discos grabados i grande ambestigador no campo musical cun muitas i honrosas ztinçones nessa área; un cacho bien passado no curral de tiu Raposo onde PACO DIEZ outro nome grande de la música castelhana i bien conhecido de ls mirandeses soube catibar quien l oubie i que interagiu de tal maneira cun quien staba alhá, que pus toda la giente a cantar cun el.

Mas l momento alto fui quando ls nuossos cunterrâneos GALANDUM GALUNDAINA doran un cuncerto que ficará pa la história, toda la giente a ls poulos, tan grande fui la buntade de beilar a l toque destes amigos.

An seguida tocoran tamien l grupo LA MUSGANHA, (Spanha) outro nome bien sonante de la música Folk Eibérica i que zpensa apresentaçones.

Diana Caramelo, que inda fui nuossa cunterrânea por uns tiempos i Miguel Nóvoa l beternário de ls burros, a par de la GGAC (Galandum Galundaina Associação Cultural), - parece-me a mi que furan ls grandes responsables por que tanta giente beniesse a la nuossa tierra i que tebissemos ua fiesta tan grande i tan animada.

Tomo you la lhiberdade, de an nome de l pobo de Fuonte Aldé les agradecer por haberen sculhido esta tierra para tan grande festa.

Bien haija a todos por todo isto.

Stá a chegar! L Burro i l Gueiteiro 2009!

2009-07-16T15:24:00.003+01:00

Ye berdade, la fiesta de ls Burriqueiros stá quaisque a chegar! I este anho queda-se dous dies na nuossa terrica adorada, Fuonte Aldé. Cun muita animaçon, e cuncertos por la tarde i por la nuite culs maiores nomes de la música tradicional ibérica! Se nun coinceis esses nomes, ide al youtube, myspace, google ó adonde bor der mais raiba para saberdes algo sobre eilhes.

Centenas de personas ban passar eilhi: uns de todo Pertugal, zde Braga anté Faro, outros tantos de la Spanha, uns poucos de la Estónia (a ber se son rapazas guapas), Bélgica, Turquia, Francia, Polónia, etc etc.
Por isso agarrai l bardeiro i barrei a las puortas de bossas casas, que Fuonte Aldé bai a ser l melhor sítio para se star naqueilhes dies.
Nun penseis que la fiesta ye para un bando de borrachos! Éls son todos gente culta e eiducada, giente studada i coincedora de l mundo. Bénen zde músicos, médicos, porsores catedráticos, actores, angenheiros, doutores disto ó daquilho, e claro, stando de férias claro que se les gusta de boer uns cacharros. Mirai que l director de ua de las maiores empresas de Bila do Conde ye frequentador repetente!

Por isso bamos a receber esta giente toda bien recebida, i, se algun tebir algua cousa buona i caseira que queira aporbeitar para poner a bender, que se chegue alantre! Que esta ye ua ouportunidade buona para se dar a coincer i porbar Fuonte Aldé!

Claro stá, quando hai assi ua ajuntança grande, ye certo que apareça algun un pouco mal antencionado, por isso hai que star atento. Mas nun faien mal a naide. Ye cumo ls arraiales de berano i ls ciganos, que nun hai ua cousa sien la outra!

Fuonte Aldé, Capital de las Eiras, nó???

2009-06-24T23:42:00.003+01:00

Diç que an Fuonte Aldé ai ua grande stançon de eiras, i ya que anda na moda essa storia de las capitals parece-me a mi que Fuonte Aldé debi de se fazer eileger capital de las Eiras assim cumo las outras tierras l ban fazendo. Esta eideia ate podie cunstar ne l papelico de las antançones agora para las eileiçones!!! A mi até me parece que si, e a bós que bos parece???

Fuonte Aldé, Capital de las Eiras.

Diç que bai haber ua FEIRA an Fuonte Aldé

2009-06-22T20:16:00.010+01:00

FEIRA DE INSTRUMENTOS MUSICAIS IBÉRICOS

Diç que nel die 29 i 30 de Júlio, la nuossa aldé bai a ser pequeinha para recebir tanta giente que bai aparecer de todas las partes de Pertual, Spanha, Francia, Dues Eigreijas, Sendin, Atanor, Infainç, Bila Chana, Palaçuolo, Augas Bibas, Picuote, Miranda, Cércio... You sei alha! Diç que ban a ser muitos.

Eiqui fica la lhigaçon para irdes a spreitar l porgrama de la fiesta. http://fim.pt.vu/

I inda dizen que nun hai rapazas an Fuonte Aldé?

2009-06-22T16:45:00.003+01:00

Ye berdade, diç que an Fuonte Aldé afinal inda hai uas quantas rapazas! La metade passan yá de ls 50 anhos, i de la outra metade, un terço ye garotada. Agora las que stan an eidades casadeiras seron cumo quiera uas 10 a 15 ne l mássimo: metade deilhas stan yá cumprometidas, i de la outra metade, 50% deilhas yá quaisque nien las conheço...

Eiqui podeis ber la maior cuncentraçon de rapazas cunterráneas, que ye na ronda de las rapazas de Fuonte Aldé, na Fiesta de la Santíssima Trindade! Esta filmaige fui de la Fiesta deste anho. Tamien queria haber filmado la de ls rapazes, mas staba ne l meio, e filmar aquanto se toca la caixa ye cumplicado..

Matrecos para aldeias zertificadas

2009-06-16T13:06:00.007+01:00

Cumo todos sabeis, diç que Fuonte Aldé ten cada beç menos rapaziada.. Ls bielhos a quedaren mais bielhos, ls nuobos a saliren de l pobo para outros pobos, an busca de feturo ó de rapazas (que eiqui tamien hai poucas..).

Na berdade agora ye de loubar, hay ua buona carga de garotada nuoba. Miesmo assi acho que nun chegan para jogar a bola de 11 contra 11.. Ye berdade, hai poucos.
Pus you passei por ua terrica spanhola l'outro die, assi de pequeinha tamien, que me deixou ua eideia baliente, tanto para Fuonte Aldé cumo para outros pobos inda mais pequeinos que l nuosso:
Matrecos de Fútbol de Salon!
Ora la associatiba tenia dantes uns matrecos, yá stan todos scachados, i toda la giente gostaba bien de jogar. Assi un cum'este tenia tanto uso ne l tiempo de férias culs imigrandes i eimigrantes todos, cumo ne l ambierno, cun 3 garotos an buota dél.
Anté se podian mercar dues mesas destas, e fazia-se tanto ne l berano cumo ne l ambierno torneios de fútbol de salon. Siempre abrigados, e claro, cun ua mineca al lhado!
A ber se cumbanceis als chefes a ber...

PIÇARRON 2009

2009-06-14T13:56:00.008+01:00

Rializou-se ne l die 13 de l San Juan, debie dezir-se Sant'Antonho yá que era l die del, mas junho ye San Juan!, la II Porba de Binos acá an Funte Aldé.

L'anho passado hoube maior partecipaçon, mas mesmo assi apareciran 14 binos çferentes que ls porbadores analizórun i abaliórun cumo pudíran ou soubíran.

Dous destes porbadores eran repetentes i afirmórun que la qualidade de la pinga chubiu en relaçon a l'anho passado.

Assi sendo parece que l principal oubjetibo de este eibento stá a dar fruitos, pus toda la giente stá a sforçar-se por melhorar la pinga i quiçá aprobeitar algum ansinamento que ls técnicos le transmitiran de la outra beç.

Mais ua beç l Sr. Gilberto Pintado, de Freixo de Espada a la Cinta, un de ls poucos produtores de bino biológico de l nuosso paíç, fizo l fabor de mos mostrar alguns slides de la sue sploraçon, de la maneira cumo trata las binhas (sin nitratos, fosfatos ou caldias que nun seian naturales), splicou la maneira cumo podemos nós tamien candidatar-mos a ua sploraçon de produtos biológicos, bino ou azeite, quales ls passos a seguir, ls apoios i/ou bantaiges que dende adbénen, quier an qualidade quier an rentabelidade i quien son ls prencipales clientes destes mesmos produtos, pus dada la forma cumo se rializa todo l processo de tratamento de la binha, l tratamento de las ubas antes i çpuis de la colheita, la ouséncia de sulfitos i outros cunserbantes, toda la trabalheira que este bino dá anté sacar la rolha a la garrafa i la qualidade ser reconhecida i certeficada, nun será para todas las carteiras.

Mesmo assi diç este tiu, que l mercado ye buono i que nun hai crise no gasto deste bino, mesmo cun precio muito arriba de la média.

L bencedor de l concurso fui l mesmo de l'anho passado, Ramiro Luis i stá de parabienes pus stá dar mostras de que sabe l que anda a fazer, mas no cómpito giral dezírun ls antandidos, que todos ls binos staban bien buonos i que tubíssemos cuidado cun els porque eran capazes de mos poner a andar de gatas.

Parabienes als ourganizadores i speramos que pa l'anho se repita l Piçarron, que haba buona pinga i salude para la buer.

Qualquiera die perde-se la proua!

2009-06-10T23:26:00.006+01:00

Diç que an Fuonte Aldé, a camino de la Chaina, Nabalho, Piçarron, Berdugal e Lhagonas ai uma grande ancruzelhada. Pus como an todas las ancuzelhadas ai um cruzeiro e cun l qual la giente ten muita prouda porque, dizen ls antandidos de l assunto, que fui feito puls romanos que stubiran na Peninsula Eiberica. Scallha ya a muito tiempo que pulhi nun passais, mas l ceuzeiro ya precisaba de ser restaurado porque cada die que passa más andeble se queda. Parece-me a mi que debie de ser amanhado. Quedanbos eiqui uas ftografies para berdes como ye que sta.

Piçarron 2009

2009-06-01T22:58:00.001+01:00

La Santíssima Trindade a la puorta!

2009-05-31T21:07:00.003+01:00

Pus ye berdade, la Fiesta grande an Fuonte Aldé de Dius Nuosso Senhor na sue forma Tripartida stá a cinco dies de chegar! I cun esta quedan dues perguntas: An quien ides a botar, i a que horas? Se a la pormanhana ó apuis de las rodas?

Cumo todos saben, este blog ye apartidário, andependiente de qualquiera raça, partido, casa, clube de bola, cerbeija, çcunjunto musical, ó nial de cucos na cabeça dels leitores, por esso nun queremos saber eiqui la buossa resposta a la purmeira pergunta!
Stamos isso si, anteressados an saber a que horas ides a eisercer la Cunstitucionalidade, que ye para apuis ne l dia cumparar cun la realidade que se passar, tanto ne l deimingo cumo ne l sábado por la nuite, que bai a ser grande!

Diç que stá a chegar la Fiesta de la Trindade

2009-05-15T23:30:00.001+01:00

Quemunidade Ouropeia proboca Fuonte Aldé

2009-04-22T16:55:00.002+01:00

Yá nun chegaba la Quemunidade Ouropeia (CE) andar a acabar cun todo an Pertual, que agora birou-se diretamente para Fuonte Aldé.
Passo a splicar: aqueilhes gaijos quieren acabar cula fiesta de la SS. Trindade. I cumo l ban a fazer? Çpuis de dáren buoltas i buoltas, lhembrórun-se de fazer las eileiçones ouropeias ne l mesmo die que la nuossa digníssima Fiesta. Se esto nun ye ua afronta a Fuonte Aldé ye l quei? A seguir ben l quei? Anstalar todos ls departamentos de la CE ne l balhe de Fuonte Aldé?
Tenemos 3 heipóteses para fazer cun que la SS. nun acabe:
- Marchar subre Lisboua i tomarmos l Parlamento (mas nun cuncordo mui cun esta, la cousa puode correr bien i depuis somos nós que tenemos que barrer aqueilha porcarie to para la rue)
- Marchar subre l Parlamento Ouropeu (tamen nun cuncordo muito, puode correr bien i temába-mos l cunta de la Almanha, Anglaterra, Spanha i Fráncia. Mas possiblemente arranjábamos porblemas cun ls EUA i podiemos zancadear la 3ª Guerra Mundial, i ls nuossos filhos nun ténen culpa que uns tontos afronten la Fiesta de la SS. Trindade cun uas eileiçones).
- Lhebar las urnas para l Cabeço de la Trindade, pedir-le a Ti Dárida para tomar cuonta deilhas (que eilha ja tubo un negócio desses), i fazer la fiesta i botar al mesmo tiempo. Que dezis?
Biba la SS. Trindade, Biba la Mocidade de Fuonte Aldé, Biba Fuonte Aldé!

L resultado de la botaçon

2009-04-14T20:08:00.002+01:00

Diç que se fizo ua sondaige hai un més eiqui, i, se naide se recuorda de l que trataba, era para que ls nuossos eilustres leitores dezíssen l que achaban sobre l bloqueio a páginas de "malucas" an Fuonte Aldé.
Pus l pobo falou cun clareza i ampenho, nun total de 44 botaçones, i dixo 68% de la giente que las cousas deben de ser lhibres!
Ora cunsiderando que Fuonte Aldé ten solo uas 70 personas a biber acá, poderíamos dezir que la amostra statística ye claramente representatiba de la populaçon an studo. Nun fuora 70% de la giente tener más de 50 anhos i pouco saberen de cumpotadores, diríamos que eran eisatamente esses bielhos que quererían la anternete lhibre!
Mas nó, bien sei que eilhes la quieren lhibre, mas nun se antendírun cun l botonico adonde tenian que carregar (dezírun-me-lo por lo menos trés tius). Por isso tenemos que pensar an todos ls que nun biben a tiempo anteiro acá, mas que bénen de fins de semana i bacaciones, i guostan de traier l cumpotador i star actualizados de toda la bida na aldeia global.
Bien sei que nós nun mandamos na ourganização de la anternete, mas ls eilustres Presidentes habian de ber isto cumo ua afirmaçon clara de l pobo.
Outra cousa se çcobriu desde la polémica de las páginas de malucas, ye que l senhor doutor doutorado cun 28 anhos quedou amuado por le habermos dado ua correcçon sobre l sou mirandés, i nunca mais screbiu eiqui.. Dizen que presunçones nun son para este blog.

Eiqui stá la lista de resultados:

Ye todo ua cochinada, hai que bloquear essas cousas! Ide para Urrós se las quereis ber!	1 (2%)
Las cousas deben de ser lhibres i que cada un faga cumo antendir!	30 (68%)
Ide mas ye pal parque jogar a bola i zligai l'anternete!	5 (11%)
Que se amolen las gaijas, l que you quiero ye cerbeija!	8 (18%)

Votos apurados: 44

Diç que quien nun ten perro caça cun gato

2009-03-31T11:21:00.006+01:00

Diç que Fuonte Aldé bai a tener un campo para jogos multiusos, para la rapaziada se antretener. Mas anquanto nun chega esse campo (esperemos que seia para brebe), i sin querer meter la política, pude ser que seia este anho que yê anho de eileiçones :) mas diç que stamos an crise, por isso yá nun sei...

Pus cumo yê hábito de las personas de Fuonte Aldé, nun fui por falta de eimaginaçon que deixou de fazer l purmeiro "Oupen Fuonte Aldé" de la sue stória. Ls organizadores metiran manos a la obra i pegoran n'ls caixotes de la reciclaige, que mal alhá cabe ua lhata de sardinas naqueilhes buraquitos (aposta que era para que las personas nun se anganhassen n'l caixote), i assi faziran l campo...agora yá fai mais santido l tírulo...

apuis, chegoran ls aficionados de la modalidade i bola pra lantre...

La organizaçon d'l "Oupen Fuonte Aldé", piede çculpas por l'ancómodo causado pur alguas bacas que passoran n'l decorrer d'l jogo, prometendo que para l'anho seran melhorados estes pequeinhos pormenores.

Papa-Móbil birou Papa-Trator

2009-03-23T20:23:00.002Z

Ye berdade! I nun stou a falar de Papa-reformas que por eiqui se ban passeando a bezes.
Pus este ye ua adaptaçon de la cabine de l Papa Móbil para ua berson tratorística. Transformou-se assi nua máquina baliente i spúria, siempre protegida pola grácia de Dius Nuosso Senhor, denominado puls duonhos de Fergusson Pope Truck, ó anton an mirandês Papa Trator Fergúçon:
Cumo podeis ber fui pintado puls proprietários de burmeilho, yá que siempre que passaban puls caminos habia siempre bielhos que tiraban las gorras e se amouchaban an jeito de se azinuolharen, pensado que staban mismo na presença de l Santo Padre. Mas apuis lhougo se alhebantában, assi que abistaban las roupas cagadas e la barba por fazer de ls proprietáiros que benian de lhabrar.

Antes de pintar diç que l Papa Trator era más ou menos assi:
Cumprendeis anton la dúbeda de ls bielhos ne ls caminos.
Dizen ls duonhos que este Papa Trator "andúbe a lhabrar l jardin de las oulibeiras muito tiempo! Mas bós que julgais!" Inda pra mais, nun ye qualquer un que se chube anriba e l pon a lhabrar, "hai que le cunfessar ls pecados!"
Ls bidros son a pruoba de bala, claro, i diç que anté ten un auto rádio cun autoreverse i todo!

Para bos ajudar a nun cunfundir esta máquina santa cun la que l berdadeiro Papa usa, stá eiqui l segredo:
L Santo Padre lhieba siempre uns quantos homes bestidos de preto e de óclos scuros, todos tan grandes cumo l bui de Bito, assi uns quantos de cada lhado de l Papa Móbil. Chamam-le siguranças.
Ne l causo de l Papa Trator Fergúçon, l máximo que podereis ber al lhado de la Santa Máquina será un perro de nome Tadeu ó cousa parecida...

De quien ye l dito?

2009-03-17T09:10:00.004Z

Onte a la tarde, fui até Fuonte Aldé a buscar ls mius garotos (fai-le bien l aire i la auga de la nuossa tierra), i staba Tiu Patalan a la puorta de casa. Nada melhor do que ir alhá a falar cun el para tirar de fuonte lhimpa l autor de l famoso dito, que tanta tinta ten feito correr.

Tiu Patalan fui prestimoso a me anformar, i dar balor a quien l ten.

Bede l bídio.

La Poda - ua ciencia eisata

2009-03-13T15:01:00.005Z

Diç que hai un tiu an Fuonte Aldé que siempre dixo:
- Acá an Fuonte Aldé só hai 3 personas que podan bien: Un sou you, outro ye tiu Nabiço, que yá se moriu, Dius l tenga, i l'outro ye Bito, que fui you que l'ansinei a podar!

A ber se sabeis quien l diç. L home stá bien bibo i animado, cumo siempre!

Por falar na poda, yá podestes tódo ó yá nien sequiera ides a la binha, porque la IC5 bai-la a botar abaixo?

Scurçon a Lisboua para ber tratores Baltra

2009-03-11T12:55:00.004Z

Diç que ne l passado fin de semana saliu ua comitiba de Fuonte Aldé a camino de Lisboua, para un cungresso de tratores Baltra! Sendo la terceira marca de tratores mais rodada an Fuonte Aldé, solo fuorun 4 personas. Cumo sabeis an purmeiro lhugar stan ls Lamburzinos, lhougo seguidos de ls Másse Fergúçons. Él habie mais un par deilhes, mas achórun melhor quedar acá, yá que la cerbeija eiqui ye mais barata.
Diç quien ls biu baixar de la carreira an Lisboua que era la comitiba mais guapa de siempre. Era l nuosso cunterráneo que nun ye dacá i tiu Couso culs sous melhores fatos de casamento, prontos para beren i tocaren ne ls nuobos e balientes tratores. Stá probado que cada beç hai menos casamentos, la giente nien se casa nien nada, por isso nada melhor que aporbeitar ua cumbençon de tratores para le tirar la naftalina a las fatiotas.

Será porí que nun hai casamentos acá porque la anternete deixaba amostrar uas malucas? Pus eso agora bai a demudar, yá que nun se puode, i hai que salir de casa para las ber. Mas se fuormos a ber, él hai un grupo bien grande de solteirones an Fuonte Aldé, i datrás nien sequiera habie anternete para se çtrairen i nun saliren de casa! A ber se alguien me splica este fenómeno...

Ua cousa ye cierta, estes dous eilustres de fato bien lhabórun ls uolhos an Lisboua! Él tanto por ber tratores tan galanes, cumo por ber rapazas buonas, que ye sabido que se ancontran muitas nun cungresso de tratores!
Ls outros dous que fuoron, yá se sabe, dá-se-les tocar l traste por ende, i buer uns copos an sítios çfrentes. Desta beç fui cul pretexto de ir a ber tratores, claro!

Aposta que uns poucos de garotos quedórun ancantados a ber este trator todo "chuning"! Tengo que bos dezir que fui you que l pintei, mas ne l Photoshop!
Bien proua tenerian alguns rapazes que you sei se tubíssen un trator assi! E eilhes nien sequiera ténen Baltras!

Posta #150: Diç que hai ua sondaige

2009-03-10T18:08:00.006Z

Cumo la posta esta sobre l causo de la censura dou tanto que falar, fizo-se ua sondaige para saber l que oupina l pobo.
Botai eiqui al lhado squierdo i dai-mos la buossa oupenion!
Debe la junta bloquear l'acesso de ls outelizadores a páiginas de cuntenidos para adultos? Que ye cumo quien diç, stá bien censurar las páiginas de malucas?

Ye berdade, yá lhebamos 150 postaiges de las nuossas boubadas eiqui. Mirai cumo passa l tiempo... :)

Diç que la censura anda por ende

2009-03-08T16:54:00.010Z

Diç que la censura chegou a la noussa querida aldé. Depuis de passar l´antruido an Tourres Bedras, parece que bieno até l praino mirandes.
Cumo bien deziran Jesé y Jaquím an su programa "Tele Curral", fai uns anhos que la noussa Junta y la A.C.Re.F.A mos diran uã cousa mi bouna, que fui l´anternet sin filos para toda la giente de la aldé, sien que para usar-la houbissa que pagar algua cousa.
Y andebimos todos mui cuntentos até que chegou la censura.
Cumo dezien ls cumpadres arriba trascrebidos, "dá pra ber uas malucas". Pus bien, esso yá ye passado, porque cun la censura yá nun se poude ber nin malucas nin malucos (tendo an cunta ls gustos de cada un(a)).
Se quejirmos antrar nun desses siítios ou abrir un que un amigo nousso mos mandou por ser angraçado, mas an que apareçan alhá uas malucas ó malucos a "brincar als médicos", nun mos deixan ber esso. Aperece alha ua mensaige que diç:
Access Denied (nun poudes antrar) y an baixo ten assi:
The requested Wed page is categorized as "sex" and has been blocked by Web Content Filter Please contact your system administrator for further information
Que quier dezir, "la pagina d´anternet que quier abrir pertence a la categoria malucas y stá bloqueada por un filtro. Por fabor cuntacta l admenistrador para mais anfurmaçones".
Y nun se queda por eiqui, porque quien quejir sacar uns programas, musicas, filmes y outras cousas, quier seia pra trabalho ou pra passar l tiempo, tamien yá nun dá.

A ber se cun este post, nun ban a censurar tamien l nousso blog!!!

L TeleCurral

2009-03-03T16:38:00.000Z

Ecocentro an Fuonte Aldé

2009-03-01T19:19:00.004Z

Quien ben de Prado Gaton para Fuonte Aldé mesmo al passar la linha hai ua placa que andica: PARQUE NATURAL do DOURO INTERNACIONAL, mas quien se assomar para la trincheira de l Piçarron bei lhougo que alhi mesmo se ancontra ua estaçon de recuolha de lixo urbano.

Ls tius que recuolhan l lixo yá muito tempo que nun lhimpan l sítio pus stá cumo podeis ber no retrato.

Pergunto you i outros tamien, l pormeiro reparo anté fui de Manel. Quei fiscalizan ls agentes de l PNDI?

Será que la nuossa Junta de Freguesia tamien inda nun biu essa bergonha?

Quedaba bien alhi ua placa a dezir - PROIBIDO ÇPEJAR LIXO

Antruido an Fuonte Aldé

2009-03-01T11:20:00.009Z

L die de Antruido ye un de ls dies mais aguardados por ls ninos de la nuossa tierra.

La ACREFA cumo ben sendo hábito desde la sue fundaçon yá ne l passado milénio, promobiu este anho tamien l tradicional çfile que tube buona partecipaçon por parte de ls mais nuobicos.

Habie çfarces para todos ls gustos, zde caçadores, soldados, aqueilhas figuras de la banda desenhada, Maries i Manuels uns mais aprumados no trajar outros assi assi.

L salon de la ACREFA torna-se pequeinho neste die porque para alhá de ls concorrentes, ben muita giente para ls ber i aplaudir.

No final de l çfile que decorriu cum muito entusiasmo i alegrie, hoube ua surpresa de la qual toda giente gustou tanto que bai a dar que falar durante muito tiempo.

Tengo muita pena de nun bos poder mostrar l filme que realizoran, mas nun l tengo en miu poder, mesmo assi deixo-bos uns retratos de ls partecipantes, de l bincedor i de ls amigos Quim i Zé .

Pus la surpresa nun fui nada mais nin nada menos que aqueilhes dous de la troubison, ls de l Curral de Moinas en carne i uosso.

Parabienes a tods ls partecipantes, specialmente a estes dous que tanto debertiran l pobo. Parabienes a la ACREFA por mos proporcionar estes spectáculos, pena ye que nun se fagan mais eibentos i que nun seiamos mais ounidos i lhuitemos todos para l mesmo fin.

Ls bigotes todos

2009-02-20T10:40:00.005Z

Eiqui teneis ls retratos tipo passe que podeis usar no bilhete de eidentidade

Ls bigotes melhores

2009-02-20T10:40:00.004Z

Ben mesmo a calhar la época de fiestas para poner esta puosta!

Ls bigotes ganhadores desta ultima cena fuorun estes.

Inda ides a tiempo se quejirdes eideias para l antruido deste anho.

Un Sartigalho ne l Porto (pausa entre çcussones apolíticas...)

2009-02-17T17:36:00.011Z

I agora para zampertigar de la cumbersa que anda nas postas abaixo, bai eiqui ua pal relax!
Pus fui you cun la mie rapaza ne l miu carroço hoije a un sitio a tratar de la bida, i quando bolbíamos, nun ye que staba un cunterráneo nosso (para quien inda nun saba, cháman-mos ls Sartigalhos) agarrado al bidro a modes de aporbeitar la boleia?!

Eilhi staba él, a chubir cumigo la rue Sá da Bandeira, i acumpanhou-me l camino todo anté la Abenida de la Boavista, adonde me baixei pal cumprimentar, só que scapou-se ninstante, nien me dixo de quien era...

Quando apanhábamos bolina era ber-lo mui agarradico al lhimpa bidros, mui acagaçado! Apuis quando parabamos nun semáforo, él alha abançaba un cachico. Eiqui podeis-lo ber an mobimiento:

Cumo quiera bieno al Porto para abisar las autoridades que an Fuonte Aldé se stá a porparar ua guerrica, i nien sequiera stamos an tiempo de eleiçones!

PSD bai a cunstruir un cinema na Fraga de'l Cuco

2009-02-11T12:00:00.006Z

Diç que l PSD bai a cunstruir ua sala de cinema al lhado de la Fraga de'l Cuco.
La localizaçon fui sculhida purque pur star de l'outro lhado de la strada ten menor ampacto ambiental i paisagístico, i tamien ye mais acecíble zde la strada als turistas que bengan.
Este ouditório bai a ser aprobeitado para ls quemícios nacionales de'l PSD.

Representantes del PS yá dezírun que isto son gastos znecesairos. Tamien acrecentórun que ls de'l PSD son cabeçudos, stoubados i boubos, botórun-les la lhéngua de fuora i terminórun cun "nhanhanha nha nha, nha".

PS bai a cunstruir un cinema nas Lhagonas

2009-02-11T12:00:00.005Z

Diç que l PS bai a cunstruir ua sala de cinema nas Lhagonas. Ban a fazer-lo adonde antes habia ua lhagona, yá que agora nunca se enche de auga. Pretende-se renobar esta zona tan guapa de'l nuosso pobo, que zde que la lhagona secou deixou de ser un sítio tan aprazíble.
Este ouditório bai a ser aprobeitado para ls quemícios nacionales de'l PS.

Representantes del PSD ya dezírun que isto son gastos znecesairos. Tamien acrecentórun que ls de'l PS son cabeçudos, stoubados i boubos, botórun-les la lhéngua de fuora i terminórun cun "nhanhanha nha nha, nha".

Stradas i mais stradas

2009-02-01T14:56:00.007Z

Muito se ten falado no IC5, mas l que mais me stranha ye que naide fale na bariante que bai a dar a Picuote i que yá stá bien mais abançada.

Ls ambientalistas, apesar de esta obra se ancontrar en pleno coraçon de l Parque Natural (PNDI), inda nada reclamoran, se calhar inda nun doran de cuonta de que la obra yá ampeçou.

Quien quejir puode certeficar-se que l que you stou a dezir ye berdade, para tal só ten que ir pul camino caras a Picuote, que an chegando àqueilhas lhastras de las Muolas, onde aparta l camino pa las Castrelheiras ha-de achar l camino quajeque tapado cun cachos de tejolos de barro i de cimento assi cumo piedras.

L pior ye que esta obra ampeçou yá eiqui acuntá i lhougo quedou cun falta de aire, de maneira que ten stado parada i cumo l camino stá anterrompido, la giente i las cria tenen que passar por riba de las fragas i anté yá armoran ua rodeira por alhá.

Bamos a ber se agora cumo stan a chegar las eileiçones, amanhan xequiera alquel cacho de camino ou rompe de beç i cun fuorça la bariante de Picuote.

Fiesta de Anho Nuobo

2009-01-03T02:31:00.002Z

Diç que la fiesta de passaige d'anho an Fuonte Aldé fui mui baliente. Quien staba a chegar de Bila Chana, inda biu als foguetes, yá se puode imaginar cumo starie animada la fiesta.

Feliç 2009 a todos ;)

IC5 i las tierras

2008-12-26T21:09:00.003Z

Spremos que todos tengades tenido buonas fiestas... i que tengades un Feliç Anho Nuobo

Diç que yá ampeça a haber muita giente a arrascar la tiesta, por causa de las sues tierras i por d'onde bai a passar la IC5. Pus quedan eiqui las eimaijes, por d'onde diç que mais ou menos bai a passar la strada. Diç que fui aprobada la soluçon 1 de la eimaige i se Dieus quejir acá staremos para ber las máquinas a trabalhar... Mais anformaçones eiqui, para berdes ls docmentos cumpletos. Yê de notar que ten l resumo d'l studo traduzido para mirandês...

IC5

2008-12-16T23:32:00.003Z

Diç que la strada IC5 bai a passar pu'la Chaina.
Parece-me que desta beç si bai a ser berdade, hoije um alicóptro fartou-se de bolar por riba de la linha.
Traie ua cousa çpindurada, assi tipo ua antena i comequiera andaba a tirar puntos, desta maneira ye mais rápido do que andando a pie.
Lhambrou-se-me a mi, nó a eilhes, mas puode ser que bengan eiqui a ber i sigan la ideia: podien traier drentro de l'alicóptro ua cousa assi como farina, ou cimento ou outro puolo qualquiera, ponien un canhico anté l chano (como fai Bito para poner las bobedas) i iban marcando. Apuis era só benir las máquinas por trás i andar para delantre, nun bos parece?

Diç que un cunjunto oufreciu ua música a la rapaziada de Fuonte Aldé

2008-12-13T23:44:00.015Z

Só pra mudar um cachico de cumbersa porque yá só se fala na cena dels bigotes (pur falar nisso, yá tengo uns pelecos bien jeitosos), bamos a falar de música. L'outro die, stabamos uns quantos na "Ourdeinha bar"a buer uas cerbeijas e a quemer uas castanhas i Duarte (l rapaç de Pragdatão que ya qaije ye mais de Fuonte Aldé que de la sue tierra) cumbidou-mos para ir a ber l cunjunto musical de Pragdatão SóVOZ , que staba a tocar an Picuote. You i mais un poucos que nun bal la pena muitos rogos para ir a tocar l traste pur ende, alha fumos. Assi que cheguemos a Picuote fumos tan bien-benidos que mos oufreciran lhougo ua música. Muito oubrigado SóVOZ, la rapaziada de Fuonte Aldé queda muito agradecida.

Se nun bos fintais mirai ende ambaixo nesse bideo.

La cena de ls Bigotes stá marcada - ANSCRIÇONES EIQUI

2008-12-02T00:01:00.007Z

Pronto, yá tenemos cartaç i todo, por isso que naide quede de fuora de la cena! Nien que seia pula trabalheira que me dou a zenhar ls bigotes de dous de ls bencedores de l anho passado!
Ye berdade, para quien nun tenga ido l anho passado, bamos a eileger ls trés melhores bigotes, que lhieban prémio!

La cena bai a ser ne l restourante L Pauliteiro, que le chaman alhá "Al Pauliteiro", cumo quera por culpa de ls homes de l café Bogani, que fazírun l reclamo. Nun son de Miranda, razon para nun saberen l mirandés...

ANSCRIÇONES: Yá sabeis, la cena stá abierta a toda la giente, de todas eidades i de todas las tierras, zde que tengan un bigote. Para bos anscreberdes, deixai eiqui an Cumentário a dezir que ides, i ponei l buosso nome (para quien nun saba, ye clicar adonde stá screbido "x DITOS").
Isto ye para se saber quantas personas ban, para tenermos chicha i bino cun fartura, sien ser para stragar, ó sien ser para passar fome! La cuonta cierta. Agradecemos todos ls que ban que lo digan eiqui!

Podeis ber EIQUI las fotos de la cena de l anho passado, para recordar i stimular criaçones bigotudas!

Cumo dezia Camposino: "Nien mais ua biespera de consoada sien bigote!"

Pul fin, la tie que nunca mais chegaba a Fuonte Aldé, la IC5!!!

2008-11-25T19:39:00.005Z

Acabei de ber na telbison ne l TalJurnal que finalmente ban a fazer la strada que se fala ha ua dúzia de anhos!
Esta nuoba solo peca por ua cousa: ye que yá deberia haber sido feita hai 50 anhos!
Atençon: nas regras de buona cunduta deste blog stá marcada un de ls mais amportantes mandamientos - "Não falarás de política!" Por isso solo hai que lhoubar la obra!
Anunciada e puosta a fazer nesta altura de l campionato ye algo sospeita para l goberno de l Suocras, mas, manuobra eileitoralista ó nó, ye la obra que mais fazie falta a la nuossa region! Mais que l reloijo de tie Fábia i l palco transportáble de ls Xho Boxh-punto-h-i-cinco-punto-com.

Podeis ber l camino que la strada bai a fazer neste sítio

Cumo podeis ber, bai a quedar entre Prad'Gaton i Fuonte Aldé, l que implica ua série de alteraçones eiminentes:
- Mais ua para forçar a que la Junta passe para acá (hehehe)
- Cumo l cacho de la strada entre Senduin i Dues Eigreijas sige l camino de l Camboio, alguien bai a quedar cun menos parreiras para podar deiqui alantre! Yá stou a pensar nuns poucos que ban a quedar cuntentos...
- Duarte-de-l-bigote-guapo-ó-se-calha-nó bai-se a ber mal para passar de la sue tierra para la nuossa, siempre a atrabessar la strada grande.. Él alhá bai a tener que cumprar ua casa acá! Inda se a casa eiqui, qureis ber?!
- L mobimiento de carros bai cuncerteza deixar de passar tanto na nuossa EN221 e passará para la IC5, por isso todos ls dies tiu Patalon bai a fazer quilómetros solo para ber se arranja ua boleia...
- La mie casa deixa de star al lhado de la strada mobimentada, por isso bou a poder tener un perrico sien que se muorra de ambaixo de un carro..
Él hai muitas mais alteraçones, que spero que mos as digais eiqui, mas ua cousa ye cierta: esta era ua buona altura para cumprar la casa de l Apeadeiro y fazer deilhi un café de strada ó ua çputeca ó inda melhor un puticlub.

Quien dixo que bigotes nun ye de macho?!

2008-11-23T22:30:00.007Z

Queda eiqui la mensaige que la cena de ls bigotes ye die 20 de Dezembre, an Miranda, nua taberna inda a scolher. Para quien inda nun sabe, i quejir aparcer tamien, stá aberto a toda la giente, de todos ls Pobos, Bilas i Cidades, só ténen que lhebar bigotes regulamentares!

Tiu Mário dá-bos uas buonas eideias para uns BIGOTES!

2008-11-14T13:33:00.004Z

Diç que yá só falta quiaije que un mês pra la Nacionalmente Falada Cena de Ls Bigotes!
Isto quier dezir que para muitos hai que ampeçar a lhibertar la gilleta de las sues funçones, e deixar ls pélos çpuntaren pal mundo!
Para quien inda nun tubo eideia de que bigote bai a lhebar, l amigo de todos, Tiu Mário, Super Mário, deixa-bos uas eideias!

Ls Pauliteiros de Fuonte Aldé deixan marca siempre adonde ban!

2008-11-12T11:42:00.009Z

Pus isto ye cierto! Siempre adonde bá l grupo de ls nuossos beiladores, toda la giente se queda cuntenta cun eilhes! Él ye la eiducaçon, la simpricidade, animaçon e la maneira de beilar, que son dels melhores! Yá para nun falar de tan bien parecidos que son! Mirai agora se tubíessen todos uns bigotes balientes que era só rapazas d'atrás deilhes!
...Çculpai, nien todos son assi tan guapos, temos a Artur de eisemplo... Pronto, nun poden ser todos por eigual.

Ls pauliteiros stubirun a beilar porí a més i meio ne l centro de l país, cun ls Galandum Galundaina, nun sítio que cumo siempre, mos recebírun bien. Apuis de l cuncerto lhebaran-mos para la Associatiba deilhes, que tenian fiesta, e dezirun-mos que podiamos boer l que quejíssemos! Todo a correr siempre pul melhor! Tengo que dezir, atençon, que naide se portou mal nien se ancharcou pur drento!

Ora alguns Pauliteiros gostórun tanto de la ouspitalidade que les deixórun ua parede assinada, assi a modes de "Bien Haja!". Bá, ua, dues, trés paredes, yá nien sei, tal fui l agradecimiento!

Pus anton stube alhá you ne l mismo sítio hai dues semanas a cumbersa cul presidente de la cumpratiba. Quedei deberas ampresionado quando bi inda la marca de ls beiladores:Agora nun sei, de las dues ua: Ou gostaram mesmo mesmo mesmo muito de ls nuossos rapazes, ó anton la senhora de las limpezas de ls quadros inda nun cunseguiu acetona fuorte l sufeciente para esquecer la sue marca!

Nuobas sonoridades para la música mirandesa

2008-10-24T01:04:00.006+01:00

Quei me dezis, rapaziada galana i bigotuda, sobre la necessidade de poner la nuossa música e la nuossa lhéngua an çfrentes tipos de música i sonidos?
Pus nestas tierras yá tenemos pul menos uns poucos de eisemplos: ls Picä Tumilho que acrecentan la genialidade de l Rock clássico de ls grandes intrumentistas de Sendin a la boubice saudable i debertida de Emílio; Sonidos de Trasgo ponen bielhos i bielhas a cantar acumpanhados de gaitas, fraitas i música eilectrónica, ó anton ls Galandum Galundaina que nun camino mais tradicional ponen un cachico de eiboluçon.

Agora bou-bos a proponer outro stilo: i que tal botar-le uas berradelas al jeito de uns bezerros balientes, uas guitarradas mais çtorcidas que ls bezerros esses, grunhir dessa maneira, i dar-le nomes cumo Heavy Metal, Dark Metal, Gothic Folk Metal, ou inda melhor, Heavy Dark Folk Industrial Neoclassic Doom Synphonic Tradicional Electro Hard Rural Matando Bacas Death Metal?
Pus claro stá, a falar de la bida de l campo, la simpricidade, ls fardos, tratores (esta ye dedicada a ti, rapaç, que nun puodo dezir l nome se nó bates-me), bacas, lhameiros, cerrados, prados, i pur ende... L que sabeis, que sodes todos de acá!

Bou-bos anton a mostrar un tiu que yá se chegou alantre, cun eideias assi: ye anglés i fala de las cousas idílicas de l campo, l mugir de las bacas (Moooo), mugir las bacas, tratores (para ti outra beç!)...
Eiqui stá! Se tubirdes deficuldades an traduzir l que diç l tiu para mirandés, dou-bos ua mano!

A 12 de Outubre... ua apariçon an Fuonte Aldé

2008-10-14T23:53:00.008+01:00

Cuonta la stória que a 13 de Maio aparciu an Fátima, pur riba de ua azinheira e para trés pastoricos, la Nuossa Senhora, que le passórun a chamar de Fátima, i fazirun-le ua capelhica. Pus eilha passou a fazer l sou spetáculo a todos ls 13 de l més, i terminou la Tourée ne l més de Outubre, ne l die pur riba dezido.
Eis que anton aparciu die 12 de Outubre, an Fuonte Aldé, ne l bairro de baixo, an riba de ua figueira, ua personaige/santo peculiar pul sou chapéu de palha i la camisa a modes de Tie Shierta de la O'Neill.

Inda nun se sabe l que quier de l mundo moderno, mas cumo quiera stá allá solo para ber las zgraças que se passan a bezes na associatiba...Ou isso ou anton para spantar ls páixaros de ls figos pur ambaixo dél!

Se fur de la purmeira, scolhiu mal l més, yá que ne l berano ye que stá toda la giente nuoba an peso i an mines. Se fur de la segunda, anté stá a funceminar, yá que ls figos quedan todos para ls duonhos de la figueira, que por sue beç, mui debotos, agradecen!

Santo pimpon i sorridente, stá siempre bien çposto para todos, mas mirai-lo nun die de bento, cumo él se abana para un lhado i para outro, a dezir nó de las tunteiras de l mundo!
Mas ua cousa ye certa, stá siempre de cuostas boltadas para Sendim..

Podemos aprender muito cun quien se assoma a la nuossa tierra...

Bamos-bos a dezir quien somos nós!

2008-10-14T23:22:00.004+01:00

Pronto, agora yá todos l sabeis, mesmo ls que çcunfiaban.
Zenhei estes rabiscos ya ban uns meses aquanto cenábamos uns poucos, e tubimos la eideia de fazer ua camisa a modes de Tie Shierta cun estas figuras, que achemos que a la giente de Fuonte Aldé le bai a gustar!
Pus pergunto-bos agora: Quien quer assi uas camisas a modes de Tie Shierta cun la figura stórica de la nuossa tierra, corte guapo i galano, i quelores modernos cumo ls de agora?
Se tubirmos pul menos 150 personas a pedir, mandamos-las fazer! Claro que se apura l zeinho para quedar melhor, e bai-bos a custar só un cachico de nada. Uas minis a menos nua nuite!

Stá a chegar l Natal (i cun el ls bigotes...)

2008-09-29T14:48:00.005+01:00

Stá na altura de irmos deixando uns pelecos nas bentas, mormente ls menos abastecidos de pelaige.

Nun faltan eisemplos de bons bigotes pur ende. Nacionales i stranjeiros ye só scolher.

L de de la cena stá para ser sculhido, mas a sou tiempo será dito.

Campanairo cun Reloijo

2008-09-28T10:14:00.006+01:00

La última nubidade de Fuonte Aldé ye esta:

Agora yá nun tenemos çculpa, quando chegábamos tarde a casa i deziemos que se mos habie parado l reloijo, cun este no campanairo a bater las horas ciertas, mais las meias horas, bai a ser cumplicado.

La suorte ye que a partir de las 10.00 de la nuite se calha. Mas ampeça outra beç a las 7.00 de la manhana cun la miesma licantina i a essa hora hai rapaziada qu'inda nun se deitou porque nun biu passar l tiempo.

"Brasa, brasa, cada un para sue casa", bai a tener que mudar de hora tamien!

Son cousas de ls tiempos.

Puoba oulimpica: cuntar furmigas de rabo alçado

2008-09-23T09:53:00.004+01:00

Fuonte Aldé candidata-se als jogos Oulímpicos 2020

2008-09-13T14:56:00.006+01:00

Diç que Fuonte Aldé apresentou al comité oulímpico anternacional ua canditura para organizar ls jogos oulímpicos no anho de 2020. Las pruobas an competiçon seran las mesmas que an eiguales ediçones anteriores, cun uas pequeinhas alteraçones, adaptadas a las tradiçones de la tierra, que muita proua ten an las mantener...

Las ourganizaçon yá stá a trabalhar juntamente cun la junta i cun la câmara pra poder tener las instalaçones i todas las condiçones para fazer ls melhores jogos oulímpicos de todos ls tiempos... La ourganizaçon stá tamien a trabalhar para que pruobas cumo la sueca, bisca d'ls nuobe, chincalhão, fito i la raiola seian pruobas oulímpicas...

Las pruobas de remo, bela, e cousas que metan auga, seran feitas nas lhagonas de la aldé. Esta eidiçon de la pruoba de 100m bai tener ls touros de Bito i Antonho Manel que seran lhargados a la miesma altura que ls atletas arracaram, la ourganizaçon nun se respunsabliza por esta pruoba poder tener mais que 100m ou se tornar numa pruoba de obstáclos, cun forme las paredes que apanhar pul camino...

Vamos a moblizar toda la giente de la tierra i que ampeçan yá a treinar padar poderan tener ls mínimos oulímpicos para apuis staran presentes nos grandiosos jogos i Fuonte Aldé puoda tener muitas medálhas de ouro. Bamos.., al trabalho....

Acunteciu an Fuonte Aldé

2008-08-31T20:38:00.008+01:00

Cunsanto se pode ber na postaige anterior, hoube fiesta an Fuonte Aldé.

Beneramos a Santa Bárbela, por quien tenemos muita deboçon i a la qual se ben fazendo ua fiesta hai tanto tiempo que naide se lhembra de quando ampeçou.

Ora cumo esta fiesta siempre fui de dança (pauliteiros), i cumo estes éran ls mardomos bai para alguns anhos, ancerróran este ciclo cu'la comemoraçon de ls dieç anhos de la existência desta nuoba fornada.

Sesta a la nuite, un famoso cunjunto de l bezino Sendin, animou la nuite anté de madrugada. La fiesta estube mui baliente.

Sábado por la manhana, ls pauliteiros, faziran l peditório beilando a todas las puortas como ye habitual, siempre alegres e bien cuntentos.

A las dues an punto, ampeçou la missa an honra de Santa Bárbela, mui solene i partecipada, cantada pu'l coro de Fuonte Aldé, cun precisson al redor de l lhugar.

Apuis de missa, ls garbosos pauliteiros, dóran un spectáclo digno de se ber, no sagrado. Toda la giente gustou i batiu muitas palmas.

A la nuite i para cumemorar la efeméride de ls dieç anhos, cumbidóran la "MIRANDANÇAS", un grupo folclórico de Miranda, cun Pauliteiras i danças mistas, que animóran la nuite i fazíran debertir muito la giente presente.

Corriu mal, que ua de las rapazas, pauliteiras, apanhou ua paulitada tan fuorte na cabeça que tube que ser eibacuada pal spital, a fin de le coseran l lanho. Aquilho nun passou dun susto, purque la rapaza inda bolbiu a la fiesta.

I agora para finalizar, pongo eiqui un retrato de la purmeira beç que salimos de la tierra, nua biage que demorou muitas horas.

Mirai rapazes se bos lhembrais deste sítio!

Oubrigado pu'l retrato, a quien me l'ambiou.

Fiesta de Santa Bárbela

2008-08-26T00:22:00.003+01:00

Fiesta de l eimigrante

2008-08-20T13:46:00.005+01:00

Ç'que tiu Zé Porto i miu pai, (fuoran eilhes ls mentores desta fiesta al 3º demingo de Agosto), anstituiran la fiesta de la Trindade pa'ls eimigrantes, nunca la bi assi tan animada.

A las 12.15 horas ampeçou la missa, mui solene, cantada pu'l coro de Fuonte Aldé. Tamien se fiç precisson al redor de la capielha.

An seguida, ls mardomos serbiran para quien quijo aparecer un rico almorço de febras i farjonada, i digo-bos, estaba mui apetitoso. Compareciu, nun sei se pu'la missa, se pu'ls farjones, tanta giente, mas mesmo tanta, que eramos mais de scacha quinze.

L almuorço fui serbido a la borda de la capielha, assi de l lhado de l lhugar, a la selombra daquels sobreiros onde las sandinesas paran a bender ls pumientos, na fiesta de l die cierto.

L repasto estaba mui buono i hoube muita quemida, que anté dou para se puder repetir las bezes que quejimos, com sobremesa e todo.

Apuis de l'almorço ls gueiteiros de la nuossa tierra tocoran an frente al bar i beilou-se alhi muito, repasseado e outras modas tradicionales.

Jogou-se la barra a la moda d'antigamente, onde ls moços mostroran la fuorça i la hablidade con la reilha.

A la nuite, junto a l nuobo bar de la ourdenha, - e eiqui se puodan tirar las dúbidas a quien las ten, - Vitor Arribas e Juan Pereira, animoran la fiesta de tal maneira, que naide quedou parado, bielhas i noubas todo mundo beilaba, daba gusto ber.

Agora pergunto you: - para quei dar miles de contos a cunjuntos afamados, que tocan lhatos sin fazer música i que nun faien beilar a naide?

Parabienes a ls mardomos.

Un Bardadeiro Sacrifício

2008-08-10T17:41:00.002+01:00

Diç que ls pauliteiros de Fuonte Aldé soun mui amportantes y stimados.
Como proba disso ai pessonas que soun capazs de dromir na miseria solo para dar buonas cundiçones de bida a eilhes. Pus isto si, ye un bardadeiro sacrificio, porque nun ye facele dromir na miseria.

Agora ya nun hai çculpas....

2008-07-28T11:22:00.009+01:00

Numa aldeia cuomo la nuossa estas cousas inda son nuobidade... Fuoran eiqui a uns dies pustos ls cuntantores para la giente poder apartar l lixo.

Deixo só algumas anformaçones para la giente que bai ampeçar:

Escuorra i çpeije todo l conteúdo de las ambalaiges;
Quando possíble, espalme las ambalaiges para ocuparen menos spaço en casa i facelitar l transporte;
Para ebitar maus cheiros puode passar por auga algumas ambalaiges;
Poner no ecoponto l saco que usou para transportar las ambalaiges usadas;
Por último, yê amportante retirar las rolhas i las tampas siempre que son feitas de outros materiales, diferentes de la ambalaige en si.

Mais anformaçõnes eiqui.