1.8.10

MALEITAS

Hai alguns anhos atrás l lhugar de Fuonte Aldé, assi como todos porqui alredor, staban arrodeados de uolmos, árbols centenairas que mataban fome a muito cochinico i daban muita selombra, onde se cuntaban muita mintira, muitas mais ficoran por cuntar i tamien se namoraba.
Ua maleita que la maioria de la giente nun sabe justeficar, you sou un deilhes, secou todo este património florístico que tanto ambelhezaba las aldés de l Praino.
Las ciguonhas aprobeitaban estes gigantes que arrodeaban ls lhugares, para ende fazeren ls nius que l serbien anhos áfios en perfeita camaradage cun storninos e pardals que fazien ls sous nius ne l mesmo prédio i muitas bezes anté l'antriçaban no própio niu de la ciguonha.
La tal maleita secou estas çantinelas seculares, a partir de ls anhos 80 de l séclo passado, para grande zgusto i perjuízo de ls lhabradores que assi perdiran algun sustento de las crias i selombras frescas ne l berano.
Eiqui há meia dúzia de anhos parecie que estas árbols habien bencido la maleita i ganhaban de nuobo lç spácio que ls pertencie por dreito própio. Yá habie alguas cun tamanho razonable i la giente yá aprobeitaba para ripar la fuolha, "Ripa a folha ao teu olmo/que eu ao meu já lha ripei/ tira de mim o sentido/ que eu de ti já o tirei", (Cantigas!!!), i assi tornar a ls tiempos datrás.
Mas para grande zgusto miu i de toda la giente, por onde quier que passemos, só bemos uolmeiras secas.

2 comentários:

Unknown disse...

Gustei de ler, bota-le que yá sós un buono scritor mirandés.
Abraço
Tiu Almendra

manel disse...

Diç que ye un birus que bieno de las Amérias, ye transportado nas patas por uns bichos que buolan, i entra polas aberturas na casca de l uolmo.
Nun cunsigo splicar melhor, que nun sei l nome de l birus nien de l bicho, mas ye isto.
Tamien yá fazíran studos que dizen que cada anho que passa las uolmeiras cunsiguen crecer un cachico mais antes que le bolte a dar l bírus! Ah Uolmos balientes! Quier dezir que daqui a uns 20 anhos yá haberá uolmeiras cumo d'atrás!
Lembro-me que dezien quando you era garoto: "Quando se acaben ls uolmos acaba-se l mundo!"
Pus stube alhá cerca, mas inda nun chegou!