24.5.10

TRINDADE 2010

Yá cheira a Trindade.

Stamos na recta final, i no fim de semana que ben, todos ls funtealdeanos quieran star presentes para la animar.

Speramos que l tiempo mos ajude, porque la nuossa fiesta merece.

Esta nun ye ua fiesta qualquiera, ye ua ROMARIA que se perde na mimória de ls tiempos por las mais bariadas rezones:

Nun se benera un santo qualquiera, nós fazemos la fiesta en honra i loubor de Dius en toda la Sue plenitude, la Santíssima Trindade, PAI, FILHO i SPRITO SANTO.

Ye ua fiesta singular, onde las mocidades de las aldés bezinas se ajuntam i cada ua a la beç dan rondas a l redor de la capielha, , cantando, boziando i dando bibas en franca alegrie.

Ls tiempos de la porrada, por la qual era tristemente conhecida yá passou, por isso nun tengades miedo, benie acá que sereis bien recebidos i tenereis ouportunidade de assistir a ua fiesta que se çtinge de todas.

Para acabar bou a poner eiqui um soneto que fiç l'anho passado por oucasion de l'ancontro de bloguers de l Praino que se rializou justamente no cabeço de la Trindade.





CABEÇO DE LA TRINDADE

Alto cabeço de berde forrado,
Guarda de l Praino, fiél çantinela,
Bés-lo anteirico dua miradela
I anté la Spanha que tenes al lhado.

Medra an tou lhombo tan rico muntado.
Mora na tue crona an casa singela,
Feita de piedra sin ua jinela,
Dius Pai, Santo Sprito i l Filho houmanado.


Fuste terreiro de guerras i amores
Quantos segredos nun guardas p´ra ti,
Suspiros, gemidos, bózios, delores...

Xaras, sobreiros, selombras i flores
Nácen, crécen i florécen eiqui
I cántan alegres ls reisenhores.

5 comentários:

Anónimo disse...

Quedeime eiqui solo para saludar todos ls fuontealdeanos i al miesmo tiempo, poder de alguã fuorma eiternizar l poema que me gustou muito.
Dasseme na alma haberdes deixado fazir uã fiesta de tres dies na cidade, en la mesma data...


sou coincido como Poeta Louco
i l meu mirandés yê fraco...
perdonaime!

Anónimo disse...

La culpa nun ye de las pessonas de fuonte aldé, mas si de ls senhores persidentes desta cámara, que nun saben que la trindade ye ua romarie i ten data fixa, cunforme l calendairo relegioso.

Anónimo disse...

I que you saba la feira mediebal an miranda ye l primeio anho que se faç, al cuntrairo de la trindade, que yá la ban ls anhos de la purmeira.

Anónimo disse...

Parece que ja nin la giente an Fuonte de Aldé,ten asuntos para fazer comentarios, cumo los atores deste blog! nun ancontron nobidades para mos spor.
Fazei bibir la nuossa tierra...........

Procura-se::::: disse...

Procura-se "Cabeço de las Binhas" ja há muito tempo que n anda por o blog, tem andado com medo de escrever barbaridades





Ah Felix poem ai um topico procura-se Cabeço de las Binhas